Kusolwa eyembuzi ngoshonile
KUSOLWA inyama yembuzi ebihlatshelwe umbondo ngokuphuma kwesidumbu emndenini wakwaBhengu, eMatabetulu, eNanda.
Kuthiwa amalungu emindeni ebiganiselana nezihlobo balale emnyango bebhuquziswa wubuhlungu besisu nekhanda emuva komcimbi obungoMgqibelo.
Kukholakala ukuthi lesi sigameko siholelele ekushoneni kukaNkk Sophiwo Bhengu (76) oshone ngoLwesithathu emuva kokuthi edle inyama yembuzi ngoLwesibili ntambama.
UMnuz Bukani Bhengu (32) uthe sebelinde incwadi yokuhlolwa kwesidumbu ukuze kucace ngokubulale ubabekazi wakhe.
“U-anti wami ugule ngoLwesibili ntambama emuva kokuthi edle inyama yembuzi eyayisale embondweni. Bese kuvele kunabagulile ngemuva kokuyidla inyama, abanye babo basagula namanje. Umuntu osabambeke kakhulu ngumfowethu.
“Ngicabanga ukuthi u-anti uze wagula ngoLwesibili ngoba yena akazange ayidle kanye nabanye. Uze wayidla ngoLwesibili wavele wagula wakhala ngesisu nangekhanda kwathi ngesikhathi elungiselelwa ukuthi azothathwa yi-ambulensi yamfica esevele eseshonile,” kuchaza uBhengu. Uthe ngesikhathi sebexoxa nezinye izihlobo kuvelile ukuthi kwaba khona izinsolo zokuthi kukhona okungalungile ngembuzi eyayithengwe eMtshebheni ngesikhathi ihlinzwa. UBhengu uthe abafana ababeyihlinza bathe imbuzi yayinolimi oluluhlaza ngokungajwayelekile futhi ithothobele, ikhwehlela. Uthe sebenethemba lokuthi umbiko wesidumbu sikayisekazi uzocacisa ukuze kungabi khona ukunukana emndenini mayelana nesigameko esenzekile.
Ngokusho kwakhe imbuzi yayithengelwe ukuhlabisa abakwamakoti owayelethe umbondo.
“Thina sanikwa ikhanda nomgogodla abakwamakoti owayelethe umbondo bathola ingxenye eyayisele.
“Imbuzi yaphekwa ngokuhlukana, abakwamakoti bacela ukuziphekela nabasekhaya bayipheka sebesele bodwa. Kwagula abantu emindenini yomibili nasezihlotsheni ezazikhona. Abantu abasindile abebengekho. Nami ngisinde ngoba bengisanda kuthola umsebenzi ngisemsebenzini. Silinde umbiko wesidumbu ngoba asifuni ukuthi kube nesimo sokunukana ngokuthakatha. Futhi sifuna kulandeleke kuvele uma le mbuzi beyivele inenkinga lapho ithengwe khona. Achaze nozidayisayo ukuthi uyidayisa kanjani imbuzi ezobulala abantu,” kusho uBhengu.
Uthe lesi sigameko sibashiye beshaqekile ngoba bebengasilindele futhi abakaze bahlangabezane nesifana naso.
UBhengu uthe balubikile udaba emaphoyiseni. Okhulumela amaphoyisa KwaZulu-Natal, uLt Col Thulani Zwane ukuqinisekisile ukuthi amaphoyisa avule idokodo mayelana nalesi sigameko.