UDhlomo uzolinda uphenyo ngolweziguli
kuneziguli ezihlukunyezwayo nezinukubezwa ngokocansi.
“Ngifike kulesi sikhungo iDurban and Coastal Mental Health ukuzoveza ukungathokozi kwami ngezinsolo ezilokhu zivelile njalo ngale ndawo zokuthi kukhona ukungaphatheki kahle kubantu bethu abakulendawo. Le ndawo akuyona engaphansi kukahulumeni kodwa iyaluthola uxhaso lukahulumeni ngaphansi koMnyango wezeMpilo noMnyango wezokuThuthukiswa koMphakathi,” kusho uDhlomo.
Uthe kulezi zinsolo esezivelile kube sekubakhona ukungenelela kwezinhloko zeminyango yomibili ukuphenya ngezinsolo ezibekiwe.
UDhlomo uthe umbiko webhodi elibhekele ukwelashwa kwezifo ezithikameza umqondo iMental Health Review Board waveza ukuthi kukhona okudingeka ukuthi kulandelelwe kulesiya sikhungo. Uthe yingakho etheleke mathupha ukuzozitholela kubaphathi baso ukuthi kwenzekani.
Uthe akazile ukuzophazamisa uhlelo oseluqalile lokuphenya olusingethwe yizinhloko zomnyango kodwa uzoqwashisa laba abenza umsebenzi wokunakekela iziguli eziphazamiseke emqondweni ngokubaluleka kokuqinisekisa ukuthi benza izinto ngendlela efanele.
Uthe okubi ukuthi lezi ziguli azikwazi ukwenza njengezinye – zimfonele uma zihlangabezana nezinkinga ngenxa yendlela ezigula ngayo. Ebuzwa ngeminye imininingwane uthe bathemba ukuthi okuningi kuzovela ophenyweni.
UDhlomo uhambela lesi sikhungo nje sisanda kuhanjelwa ngokhulumela ezempilo kwiDA, uDkt Imran Keeka othe kubalulekile ukuthi uDhlomo aye kulesi sikhungo ngenxa yezinsolo zokuhlukunyezwa kweziguli.