ICosatu igqugquzele ukwesekwa kwezinye izinyunyana
ICOSATU igqugquzele ezinye izinyunyana ukuthi ziseke isiteleka sabasebenzi bemboni yezicathulo emuva kokudutshulwa kwezisebenzi ezinhlanu akade zibhikisha ngaphandle kwefemu yazo eseJacobs.
Izisebenzi Eva Industries naseHopewell Industries zithe ngeke ziyeke ukuteleka kuze kube umqashi uzinyusela amaholo ngo-9.5% aqhubeke nokubanika imihlomulo.
Izolo uMnuz Zola Saphetha onguNobhala weNational Education, Health and Allied Workers Union (Nehawu), ukugxekile ukudutshulwa kwezisebenzi esho nokuthi banelungelo lokutelekela amaholo.
“Abasebenzi bebetoyiza ngaphandle kwefemu ngesikhathi befuthwa ngesisi esikhalisa unyembezi bedutshulwa ngezinhlamvu zenjoloba. Akwamukelekile ukuthi amaphoyisa adubule abantu lokhu sikubona kuyizindlela zokubasabisa ukuthi bafune amaholo angcono,” kusho uSaphetha.
Ucele uhulumeni ukuthi angenelele ekutheni kungadayiswa kakhulu izicathulo ezivela eChina ngoba kungena u-90% wazo ezitolo bese ezakuleli ziba wu-10%.
Esitatimendeni uMnuz Sizwe Pamla okhulumela iCosatu kuzwelonke, ugqugquzele izinyunyana ukuthi ziseke isiteleka sabemboni yezicathulo esho nokuthi zonke izinyunyana kufanele zisekane uma kuneziteleka ezimbonini ezihlukene.
Siyaqhubeka nesiteleka sezisebenzi zefemu ekhiqiza insipho eseJacobs.
Siyaqhubeka nesiteleka sezisebenzi zaseposini njengoba inyunyana yabo ibisaxoxisana nabaqashi ngesiphakamiso esisha.
Akukho okushintshile ngesiteleka sezisebenzi zakwaEskom njengoba izinyunyana zisalinde ukuzwa ngomhlangano wazo noNgqongqoshe wezeziMali uMnuz Nhlanhla Nene uzoba nini.