Iningi lawe-PSL lizothinteka ngodaba lwePSL
ISINQUMO sePremier Soccer League (PSL) sokuludlulisela phambili icala elithinta i-Ajax Cape Town noTendai Ndoro, sibukeka sizoza nezinkinga ezinkulu kule sizini ye-Absa Premiership okumele iqale ngo-Agasti.
Nokho lolu daba lusazohamba ezinkantolo alukazukuya kwiFifa.
Izolo esithangamini nabezindaba, eGoli, iPSL iphinde yagcizelela ukuthi imidlalo yePremiership izoqala nakanjani ngo-Agasti 4, nokuthi izolinda umphumela wecala esilidlulisele phambili.
Emasontweni edlule inkantolo yaseGauteng, ngezwi likaDenise Fisher, inqume ukuthi isinqumo sikamehluleli ozimele weSouth African Football Association (Safa), uWilliam Mokhari, sokuthola i-Ajax inecala, sibekwe eceleni. Lokhu bekuchaza ukuthi i-Ajax kumele ibuyele kunombolo 15 bese kuthi imidlalo yokuhlunga edlalwe yiPlatinum Stars, Jomo Cosmos neBlack Leopards, ithathwe njengento engekho.
Kuyacaca ukuthi ukuqhubeka kwemidlalo yePSL lingakaphothulwa leli cala, kuchaza ukuthi iLeopards izodlala kwiPremiership, bese kuthi i-Urban Warriors idlale kwiNational First Division (NFD). Ngabe kuzokwenzekani uma i-Ajax iphinde iliwina icala sekudlalwe imidlalo engaphezulu kwewu-10? I-Ajax ngabe izohlala nje isonge izandla uma iPSL iliwina icala noma izoqhubeka ilwe njengoba yenzile ezinyangeni ezidlule?
Le mibuzo izophenduleka ngokuhamba kwesikhathi kuphela, futhi kubukeka buzoba buningi kakhulu ubuhixihixi kule sizini ezoqala ngenxa yaleli cala. I-Ajax ike yahlongoza ukuthi kungakuhle ihlangane nePSL bahlale phansi bathole indlela eya phambili ngalolu daba ngoba bobabili abekho msulwa. Nokho kubukeka iPSL ingazimisele ukwenza lokho njengoba vele isisithathile isinqumo sokudlulisela icala phambili.
Okumele kuhlaluke ukuthi ne-Ajax iyobe isenalo igunya lokuliqhuba icala uma kwenzeka livuna iPSL okusho ukuthi kusazoba ugingqi gongqo. Kuyinto engemnandi ukuthi kuqale imidlalo yeligi kunesiphithiphithi esinjena ngoba kugcina kuphazamiseka nabantu abangahlangene nhlobo necala eliqhubekayo. Akukho ukungabaza ukuthi wonke amaqembu ePSL azothikamezeka ngalolu daba ngoba akulula ukusho ukuthi luzophetha kanjani. Sesoyicela ivuthiwe.