Ufuna ukudedela intsha emikhunjini
UFUNA ukushiya adedele intsha yakuleli emnyama ukaputeni wokuqala omnyama ukushayela umkhumbi iSA Aghulas 2, okuyiwo kuphela owazi ngokufohla naseqhweni. UCaptain Mfanafuthi Knowledge Bhengu (38) waseMlaza, waqala ngo-2013 ukushayela lo mkhumbi ngaphansi koMnyango wezeMvelo.
YiNingizimu Afrika kuphela enalolu hlobo lomkhumbi osiza amanye amazwe ase-Afrika, ngocwaningo lwezamanzi. UBhengu uthe uzibekele umgomo wokuthi ashiye emkhunjini uma eseneminyaka engu-40. Ufuna ukushiya esebizwa ngodokotela njengoba enza iPhd kwiMaritime Studies.
“Kumele ngiphume ngidedele abanye abamnyama ngoba sengiwuqophile umlando. Ngizibona ngimele bonke abamnyama ngoba konke engikwenzayo ngiphakamisa igama labo. Anganelisekile ukuthi sengiwukaputeni kodwa ngisafunda futhi ngiyamenywa ukuzokhuthaza intsha emalokishini, “echaza.
Uthe uma eshiya emkhunjini ufuna ukungena emkhakheni wamabhizinisi kwezamanzi. Ukhuthaza nentsha ukuthi ibheke amathuba kulo mkhakha. UBhengu ukhala ngokuthi intsha ibulawe ukuthi ilindele ukwenzelwa yonke into kanti kumele ifundiswe ukuzimela.
Ugxeka nabazali abakhombisa uthando olweqile bangafundisi izingane ukuthi zizijulukele. Uthe yena waqala eneminyaka elishumi ukukwazi ukuthenga isinkwa ngemali azibekele yona yize engakhulanga ehlupheka. Echaza ngomsebenzi wakhe njengokaputeni uthe ufana nomphathi wenkampani ngoba konke kubuzwa kuye.
“Asikho isikhathi sokuphumula ngike ngihambe amahora angaphezu kuka-36 emkhunjini. Ngivuswa nasebusuku uma kukhona abangakuboni kahle ngoba ukuphepha kubalulekile,” echaza.
UBhengu uzophinde aqophe umlando ngoJanuwari njengoba ezoba yingxenye yethimba elizokwenza ucwaningo e-Antarctica. Kuyocwaningwa nomkhumbi waseBritain owavaleleka eqhweni eminyakeni engu-100 edlule. Uthe uzizwa ethobekile ukuthi uzoba yingxenye yaleli thimba elizoqopha umlando. Waphothula u-matric eZwelethu High wayokwenza izifundo zeMaritime eNatal Technikon esibizwa ngeDurban University of Technology. Waqala ukuqeqeshwa yi-African Maritime Solution ngo-2002 washayela nemikhumbi yakhona. IKHASI ELIKHOKHELWE