Yayenzelwe ukuheha abathengi iStepway

NGESIKHATHI beyethula iRenault Sandero Stepway Plus kwaRenualt babenethemba elikhulu lokuthi izoqhubeka nokuheha abathengi beSandero.

Angazi noma kungenxa yayo yini kodwa isibalo sokuthengwa kweSandero sikhombisa ukunyuka.

Okungenza ngithi angazi noma kwenziwe yiyo yini wukuthi uma kukhishwa izibalo akushiwo ukuthi kuthengwe yiphi inhlobo yeSandero kunalokho kuvele kushiwo izibalo ezihlanganisiwe.

Phela izinhlobo ezikhona zeSandero zintathu, okuyiSandero Expression, Renault Stepway Expression neStepway Plus engene esikhaleni neStepway Dynamique.

Ngo-Ephreli angu-261, ngoMeyi abe ngu-489 kwathi ngenyanga eyedlule aba ngu-937.

Lesi yisibalo esihle ngoba kuyenza imoto yesibili ukuthengwa kakhulu kule nkampani ngemuva kweKwid yona okudayiswe angu-1 023.

Itepway Plus sigqame ngamasondo anamakhava anemibala emibili angu-16 inch kanjalo nemibala eyehlukile enguDune Beige noCosmos Blue.

Ifika nama-airbag asemaceleni, amawindi kagesi, izibuko zasemaceleni zihlelwa ngogesi, isiteringi sesikhumba kanjalo ne-rear park assist. Ifika futhi ne-cruise control ne-navigation kanti uma uthanda uyakwazi ukufaka izihlalo zesikhumba.

Igabe futhi nangekhamera eveza ingemuva uma uhlehla. Ngaphakathi ifika neRenault MediaNav nemultimedia system engu7 inch touchscreen.

Le moto ishaya ngenjini eyithreecylinder 900cc ene-turbo kaphethroli. Ikhahlela amandla angu-66 kW netorque engu-135 Nm.

Ukusuka ku-0 iye ku-100km/h kuyithatha imizuzwana engu-11.1 kanti ijubane elikhulu ngu-169 km/h. Ngebanga lika-100km bathi isebenzisa amalitha kaphethroli angu-5.4.

Ngemuva kokuhamba ngayo engikuqaphelile wukuthi bayakhe yancipha umsindo wangaphandle ngaphakathi futhi inamandla enele ngoba uma udlula enye imoto uyakwazi ukwenza lokho ngaphandle kokuqala phansi amagiya.

Ngihambe ibanga elingu-482.7 yasebenzisa amalitha kaphethroli angu-7.7 kanti ithe ibisengakwazi ukuhamba omunye u-210km ngaphambi kokuthi uphele. Inani Renault Stepway Plus R206 900

Izihlalo zesikhumba zinguR10 000 kanti i-metallic paint inguR2 500.

Ifika ne warranty yeminyaka emihlanu noma u-150 000km ne service plan yeminyaka emibili noma u-30 000km.

Kumele iye kwisevisi ngemuva kokuhamba u-15 000km