I-VW Arteon ayiwakhohlisi amehlo
FANELESIBONGE BENGU IMOTO: VOLKSWAGEN ARTEON
KUNABANTU noma izinto othi uma kade uzibona ezithombeni bese ziba nomehluko omkhulu uma usuzibona bukhoma.
Kungaki nje ngizwa amajita ethi ahlangane nomuntu ezinkundleni zokuxhumana “ebaba” kodwa okuthe uma sebehlangana bukhoma kwangaba yilo muntu akade embonile.
Lokhu kudalwa yizinto ezahlukene njengokuthi abanye bafaka iziphaqulo ebusweni noma indlela umuntu azishutha ngayo. Kwesinye isikhathi kuba yi “filter” okanye isiphaqulo esifakwa esithombeni uqobo ukuze sibukeke kangcono.
IVW Arteon ayiwakhohlisi nhlobo amehlo akho uma uyibuka ezithombeni nanoma usuyibuka bukhoma ngoba yinhle.
Nangesikhathi ibonakala okokuqala embukisweni iGeneva International Motor Show ngoMashi wonyaka odlule, wonke umuntu wayebabaza ubuhle bayo.
Lobu buhle engikhuluma bekufakazelwa nawukuthi yonke indawo lapho iqhamuka khona abantu baphenduka nayo.
“Le moto kade ngiyibona nje ezithombeni ibhalwe ukuthi iyeza maduze kanti ishisa kanje,” kusho omunye umbhemu.
Ebesihamba ngayo yi-2.0 TDI R-line enombala omhlophe abawubiza ngoOryx White. Uma iqhamuka iyagqama kwazise ishaya ngamalambu angamaLED ahlangene namadaytime running lights. Kuphinde kube nolayini beradiator grille abayi chrome.
Ichrome le igijima nasemawindini eceleni kanjalo nasezicabheni ngezansi. Nangemuva izinqawe zigoqwe nge chrome. Ebhuthini ishaya ngespoiler esimnyama futhi ngemuva ishaya ngamalambu ayiLED anedynamic indicator light function, nokusho ukuthi ama-indicator ngathi adweba umugqa.
Emasondweni bayigqokise iRosario 20 inch Alloy Wheels oyifaka uma uthanda njengoba yona ifika nangu-18 inch.
Okhakhayini ine panoramic sunroof.
Uma ungena ngaphakathi yilapho ubona khona ukuthi le moto inkulu kangakanani ngoba abagibeli abayisihlanu bangena khaxa ngokukhululeka ezihlalweni zesikhumba.
Lokhu kungenxa yokuthi iwheelbase yayo inde njengoba ingu-2 841mm.
Ibhuthi wudedangendlale kwazise ingu-563 litres. Uma ungenele ngalesi sikhala ukwazi ukuxhuma inqola nge towbar obuye uyifihle ngebhathini.
Umshayeli ubhekana nesiteringi esinamabhathini ahlanganisa neleAdaptive Cruise Control, ezinyaweni unyathela ama-aluminium pedals, futhi izihlalo zangaphambili ziyafudumala ziphinde zikuwotawote.
Ngaphandle kwalokhu kukhona i-Active Info Display eveza yonke imininingwane ngemoto.
Ngaphansi kwebhonethi kukhona injini kadizili engu-2.0 enamandla angu-130 kW netorque engu-350 Nm. Ugearbox uyi-6-speed DSG. Lolu huntshu bathi kulithatha imizuzwana engu-8.7 ukufika ku-100km/h kanti ijubane elikhulu ngu-220km/h.
Uma usuka amandla iwathumela ngokushesha emasondweni futhi ziningi izimoto ezincane ezidlisela ogageni ngamandla enawo.
Okufike kuchaze ukuba ntofontofo kwayo nokuyenza kunganqeneki ukuthatha uhambo olude ngayo futhi emakhoneni iyabambelela.
Ngebanga lika-100km bathi iphuza amalitha angu-5.9 kadizili kodwa ngemuva kokuchitha izinsuku eziyisikhombisa nayo ibidla amalitha angu-8.0.
Okufike kube kuhle wukuthi inethangi elikhulu nongahamba ibanga elide ngaphambi kokuyetha njengoba lingu-66 litres.
Kwezokuphepha ifika ne-Active Bonnet eyenza ukuthi uma ishayise umuntu uphakame ukuze avikeleke futhi inePark Package esebenzisa amakhamera ukuveza umzimba wonke.
Ngicabanga ukuthi kwaVW bakhe imoto enhle futhi engagcini nje ngobuhle kodwa evulekile, ukuyisebenzisela izidingo zansuku zonke nenenjini eyihlala khaxa.
Okuhle wukuthi izinto eziningi ephuma nazo akudingi ukuthi ufake imali ethe xaxa.
Ibanga abathengi nezimoto ezifana neJaguar XE 20d Prestige, Audi A5 Sportback neBMW 420d Gran Coupe. Inani 2.0 TDI 130 kW R-Line DSG R649 900
Ifika neMaintenance Plan yeminyaka emihlanu noma u-90 000km, warranty yeminyaka emithathu noma u-120 000km ne anti-corrosion warranty yeminyaka engu-12 kanti kumele uyise kwisivisi ngemuva kokuhamba u-15 000km.