I-Opel itshale izindodla eNingizimu Afrika
ISINGAPHEZULU kuka-R1 billion imali etshalwe yi-Opel eNingizimu Afrika njengoba le nkampani isiziphathele umsebenzi ngemuva kokuhoxa kweGeneral Motors eyayingabadayisi bayo.
IGeneral Motors inyule kuleli ekupheleni konyaka odlule. I-Opel Germany isungule igatsha i-Opel South Africa (PTY) LTD kwatshwalwa imali engaphezulu kuka-R700 million kumaphathi, ama-warranty nokusevisa amakhasimenda akwa-Opel e-Africa eseningizimu.
Ngaphezu kwalokhu, amagaraji atshale uR20 million ukuthuthukisa indlela abukeka ngayo.
IMenenja Jikelele yakwaUnitrans Opel Southern Africa, esabalalisa lezi zimoto kuleli, uBrian Hunter uthe bafuna ukudala amanye amathuba omsebenzi nokuseka amabhizinisi.
Njengamanje amagaraji adayisa i-Opel angu-35 futhi kulindeleke ukuthi kuvulwe amanye eminyakeni emihlanu ezayo.
Uthe bajabule ngokuthi imali esitshalwe kwa-Opel isingaphezulu kukaR1.5 billion uma behlanganisa ukutshala kwe-Opel International, Unitrans namagaraji.
“Siqagela ukuthi lokhu kuzoqasha abantu abangaphezulu kuka-1 000.”
Umqondisi wokudayiswa kwezimoto zakwa-Opel emhlabeni jikelele uBill Mott, uthe bagxile ekundlondlobaleni e-Afrika eseningizimu.
“Sibuka iNingizimu Afrika njengemakethe ebaluleke kakhulu.”
I-Opel isineminyaka engaphezulu kuka-80 iseNingizimu Afrika. I-Astra yaqokwa njengemoto yonyaka yakuleli ngo-2017.