Bayivivele iDundee July abengqephu
INHLANGANO yabasiki bengqephu iKwaZulu-Natal Fashion Council ithi konke sekumi ngomumo kubasiki bengqephu baseThekwini abazokhangisa kwiDundee July.
Lo mcimbi obukeka unesasasa uba sedolobheni eDundee minyaka yonke emuva kwendumezulu yomjaho wamahhashi oba seThekwini, iVodacom Durban July.
Inhloko yezokumaketha kule nhlangano uXolani Zulu ithi bazofaka nabasiki bengqephu esebenamava kulo mkhakha ukuze bakwazi nokucobelela ngolwazi ozakwabo abasafufusa. Phakathi kwabo kubalwa uShaun Majola weNguni Shades, Duke Mngadi weDuke, Musa Sibeko we-Afro Amanno nabanye.
UZulu uthi ukuba khona kwalaba basiki kuzoba nomthelela omuhle nasezingeni lengqephu ezokhangiswa.
“Kulo nyaka sibe nenhlanhla yokuthi Ithala lizokwengeza uR15 000 kwabathathu abazohamba phambili emincintiswaneni. Lokhu kuzosiza ukuze bakwazi ukuba yingxenye yomcimbi wengqephu ozoba ngoSepthemba eThekwini,” kusho uZulu.
KwiDundee July imikhakha emithathu ezobe ibhekwe kakhulu emncintiswaneni wengqephu yiBest men’s wear, Best women’s wear neMost creative.
USibeko we-Afro Amanno wahamba phambili ngo2016 walandelwa yintokazi yaseMajuba eNewcastle nyakenye uZama Masondo.
Abasiki bengqephu bendawo nabo sebelinde impelasonto ukuze bakhiphe unyawo ngokusho kukaBheki Ncube woMnyango wezeMidlalo nezobuCiko KwaZulu-Natal.
Ngaphandle kweDundee July iKwaZulu-Natal Fashion Council imatasa nokulungiselela uhambo lwabasiki bengqephu abangu-15 abayokhangisa phesheya kwezilwandle eLondon.
UZulu uthi lolu hlelo balwenza ngokubambisana nomnyango wezoHwebo neziMboni kuleli. Okuhlaba umxhwele ukuthi kulaba basiki bengqephu abawu- 10 kubo baqhamuka KwaZuluNatal.