Indida ngokufa kwekhehla ebelino-66
USAKHUNGATHEKILE umqashi ngokuholele ekufeni komsebenzi wakhe wasengadini otholwe edindilizile ekamelweni abehlalo kulona eliyigalaji, eGrange, eVerulam ngoMgqibelo ntambama.
Umqashi kamufi, uMnuz Athmanand Supersad, uthe usathukile ngokufa komsebenzi abesemthatha njengelungu lomndeni.
“Angikholwa wukuthi uzishonele umufi (66). Kuthe ngoMgqibelo emini ngavuswa umsindo obuphuma egumbini lakhe. Ngifike kukhona amadoda amabili, eyodwa inkulu futhi iyinde, iyisikhondlakhondla iphethe ubhiya, ihamba nomfana othe ungumshana kamufi kodwa engingakaze ngimbone nangelilodwa ilanga emvakashele,” kusho uSupersad.
Uthe ubuze ukuthi bafunani kumufi notshwala ngoba udokotela ubethe angaphuzi ngoba uyagula uphethwe amaphaphu.
Uthe bamphendule ngokuthi bafuna ukumthatha bamyise enyangeni ngoba odokotela sebehlulekile.
USupersad uthe amadoda aphinde aveza ukuthi akusekho okungenziwa odokotela yingakho bebona kufanele bamthathe.
Uphinde waveza ukuthi umufi ubenamadodana amabili, enye yawo ubejwayele ukuyibona endaweni kodwa ingezi ukuzobona uyise.
Uchaze umufi njengomuntu obethandeka futhi enenhliziyo enhle, wathi ubenza izingadi zawo wonke umuntu emgwaqweni abahlala kuwona.
“’Kuthe eseqala ukugula ngatshela enye yezintombi zakhe ukuthi ayibikele umndeni wakhe ose-Eastern Cape, ukuze uzombheka ngoba kube nesikhathi la egule khona kakhulu engasadli nokudla.”
Umshana kaSupersad ongafunanga kudalulwe igama lakhe uthe umufi ubenomuntu wesimame obemnakekela, azitholela yena ukuze amsize njengoba ebegula.
“Kuyasolisa ukuthi ngesikhathi eshona umufi, owesimame omsizayo akagijimanga weza kithina, simbone emi nalo mlisa (isikhondlakhondla) obefike nomshana emini ethi umufi udinga inyanga,” kusho yena.
USupersad uphinde wathi ngesikhahi efika kumufi eseshonile ufice amehlo ekopolotiwe nolimu lubukeka sengathi luhluthuliwe.
Okhulumela amaphoyisa KwaZulu-Natal, uLt Colonel Thulani Zwane, usiqinisekisile lesi sehlakalo kodwa wathi imbangela yokufa ayikacaci futhi akekho osaboshiwe, uphenyo luyaqhubeka,” kuphetha uZwane.
Amalungu omndeni kamufi abengakatholakali.