Bamashele isihlava esihlasele isizwe
ABESIFAZANE bakuso sonke isifundazwe iKwaZulu-Natal abangamalungu ebandla iThe Methodist Church of Southern Africa bathi sekubami emphinjeni ukuhlukunyezwa kwabesifazane ngabantu besilisa.
Abesifazane abebeholwa ngumengameli wabo wesifunda iNatal Coastal, uNkk Nomusa Makhaye, bamashele esiteshini samaphoyisa kwa-GG eMlaza ngoLwesine.
“Sihambise uhlu lwezikhalo zethu sizwakalisa ukuhlukumezeka kwabesifazane namantombazane abulawa ngabantu athandana nabo. Sithe emaphoyiseni sekwanele manje siyacela ukuthi enze umsebenzi wawo. Nathi siyiMethodist Church of Southern Africa sizimisele ngokuthi sisebenzisane nawo kuqedwe lokhu. Sikhathele amantombazane ebulawa phambi kwethu nawo amaphoyisa awadlale indima enkulu. Sesikhathele ngempela kudlwengulwa izingane ngomalume, omkhulu nobaba.”
Unxuse amaphoyisa ukuthi aqinise umthetho ukuze nabangakaqali ukugila lokhu bangacabangi.
Abesifazane abangaphezulu kuka-600 bahlanganyele esikoleni Umlazi Comtech lapho benengqungquthela ababa nayo minyaka yonke esongwe izolo.
Bebegqoke izimpahla ezimnyama ezibhalwe uThursday in Black abathe bazile ngazo ngoba bezwelana nabesifazane abahlukumezekile abashona nabasaphila.
“Yindlela esithandaza ngayo sikhombisa ukuzwelana nabo.”
UNkk Makhaye unxuse abesilisa abahlukumezayo, njengoba kuyinyanga yabo nje, wathi mabayeke ngoba “thina asinawo amandla ngaphezu kwabo”.
Uhlu lwezikhalo lwamukelwe wumphathisiteshi obambile uColonel Mohamed Soobrathi othe ibandla lingalekelela kakhulu ekuqedeni ubugebengu njengoba kuyilo elisemphakathini ngqo futhi libona liphinde lizwe konke.
Okhulumela amaphoyisa aseMlaza, uCaptain Carmen Rhynes, uthe: “Kuyangijabulisa ukubona abesifazane abaningi kangaka behlangene belwa nobugebengu. Ukubambisana okuzokwenza ukuthi sifeze injongo yokuhlala ngokuthula naseNingizimu Afrika engenabugebengu.”
UZITHINTELE EBANTWINI EPHAWULA NGEDIVOSI KA-MASECHABA NDLOVU
Tewzin Mokoena: Kanti kwakumele kube uMasechaba kuphela yini othandazela abahlukanayo? Musani ukuphaphela uMampintsha nina. NoMasechaba indlela akhuluma ngayo ngathi yena ulungisa kwasani engahambi kahle kanti uhlulwa umuzi wakhe.
Dlamini Phumlani Spha: Hhayi nalo Mampitsha wenu ukhuluma kakhulu. Manje usezoqophisana noMasechaba? Anomkhuza angalokhu epepereza esidlangaleni, uzenza isilima ngempela ungaze uthi wayeshadile emlobolile nalo Babes wakhe. Yakhuluma indoda ikhulumela umjolo.
Qaphelani Zwelenkosi Ngcongo: Mthandazele wena Mpintsho wayekuphaphela kanti ziyamhlula ezakhe xhivi xhivi phansi emjondolo.