Isinqumo se-IFP ngengqungquthela
IZOBA kulo nyaka ingqungquthela ye-IFP ebhekwe ngabomvu yokukhetha ubuholi obusha bukazwelonke lapho uMengameli weqembu, inkosi uMangosuthu Buthelezi, kulindeleke ukuthi azibeke phansi izintambo ngokusemthethweni.
Ingqungquthela ye-IFP kulindeleke ukuthi ibe ngasekuqaleni kuka-Okthoba.
Isinqumo sokuthi kube nengqungquthela kazwelonke sithathwe emhlanganweni weqembu obuseCoastlands Hotel eThekwini ngoMgqibelo.
Kuthiwa i-IFP izoqala ibe nengqungquthela kazwelonke bese kuthi lezi ezinye izingqungquthela zilandele kamuva.
Engqungqutheleni kazwelonke kulindeleke ukuthi umholi ophakanyiselwe ekutheni avale isikhundla sikaButhelezi, uMnuz Velenkosini Hlabisa akhethwe ngokusemthethweni.
Okhulumela i-IFP kuzwelonke, uMnuz Mkhuleko Hlengwa, uthe babe nomhlangano wabo obungavulelekile ngoMgqibelo lapho kuthathwe khona izinqumo okubalwa nokuba nengqungquthela kazwelonke.
“Uzokhumbula ukuthi usuku lwezingqungquthela luke lwakhishwa phambilini kodwa zaphazamiseka zangaba khona ngemuva kokuvela kodaba lwamaziko ayizipoki nokwaholela ekutheni kuthiwe awacwaningwe wonke amaziko. Uhlelo lokucwaninga lwenziwe akhishwa wonke amaziko ayizipoki, umhlangano wangoMgqibelo ubikelwe ukuthi asemaningi kakhulu manje amaziko asesimeni esikahle,” kusho uHlengwa.
Uthe umhlahlandlela uzobe usumemezela ngesikhathi esifanele ukuthi ingqungquthela izoba nini.
Yize uHlengwa engazange alinganise ukuthi ingqungquthela ingaba nini kodwa imithombo engaphakathi eqenjini ithe izoba sekuqaleni kuka-Okthoba.
“NgoSepthemba 27 kuya ku-29 sizoba nengqungquthela yokubuyekeza umthethosisekelo nemigomo yeqembu ngaphambi kokuthi kube nengqungquthela kazwelonke ekuqaleni kuka-Okthoba,” kusho umthombo.
Kule ngqungquthela kulindeleke ukuthi kuphakanyiswe uHlabisa njengomholi omusha we-IFP.
UHlabisa okwamanje unguNobhala we-IFP KwaZulu-Natal aphinde abe yiMeya kuMasipala, iBig 5/Hlabisa.
Ukuphakanyiswa kukaHlabisa kulandela ukushaywa ngesithende kwenkosi yaseMbhongombhongwen, inkosi uMzamo Buthelezi. Inkosi uMzamo (Buthelezi) iyona okwakubhekwe ukuthi ivale isikhundla sikaMntwana waKwaPhindangene njengoba kade ifakwe esikhundleni esasingakaze sabakhona sokuba yiPhini likamengameli.
Isolezwe lithole ngemithombo yalo engaphakathi kwi-IFP ukuthi ubekhona omunye umholi weqembu omdala obesigaqele lesi sikhundla eseze waqala nomkhankaso kodwa wabuye wahosha imfe ngoba ebona ukuthi ngeke alibone elidlayo kuHlabisa ikakhulukazi njengoba egcotshwe nawuButhelezi.
Emhlanganweni wangoMgqibelo kuthiwa uButhelezi ucele ukuthi kuqale kube nengqungquthela kazwelonke ukuze azibeke phansi izintambo.
“Umengameli uthe ucela ukuthi kube nengqungquthela kazwelonke kuqala ngoba isimo sikaNdlunkulu wakhe u-Irene sikhomba ukuthi kumele abe seduze naye,” kusho umthombo.
Ngokusho komthombo uButhelezi ubefisa ukuthi ingqungquthela kazwelonke ibe ngaphambi kokuthi kube nomgubho wosuku lwakhe lokuzalwa lapho ezobe ehlanganisa iminyaka engu-90.
UButhelezi wazalwa ngomhla ka-27 Agasti 1928.