Abantu abangiqondi kahle: Eymael
kungenzeki lutho ekupheleni kwezinsuku engizibekele zona kuze kuba uJuni 12, ngizobuyela kwiFree State Stars. Abantu kade bethi, engicabanga ukuthi akulona iqiniso, ngiyazithwala futhi nginqumela ugwayi katiki amaqembu. Akukaze kube njalo. Bekuwukuma emazwini ami ngoba ngethembisa uRantsie Mokoena (imenenja yeStars) ukumgcina ewazi amaqembu akhuluma nemenenja yami,” kusho u-Eymael.
“Ngamthembisa ukuthi angifuni ukumenzela phansi, uma kukhona okwenzekayo kuzoba ngaphambi kukaJuni 12. Isizathu esenza ngenze lokho kungenxa yezintatheli nabantu abathize. Ungayihumusha ngendlela yakho kodwa mina ngangigcina amazwi ami. Abanye abantu kade bengithuka ezinkundleni zokuxhumana kodwa manje niyabona ukuthi ngibuyile kwiStars ngaphandle kokuthi kade ngifunwa naphesheya.”
IStars ihlulwe yiChiefs ngo 6-5 sekushaywa amaphenathi kowamanqamu weBokone Bophirima Maize Cup eJames Motlatsi Stadium, eNorth West, ngoMgqibelo. Nakuba umqhudelwano uthathwa njengowokuzicijela ukuqala kwesizini nokuhlola abadlali abasha kodwa u-Eymael ubebukeka efuna ngakho konke ukwehlula iChiefs. IStars idlalise nabadlali abasha okukhona kubona umgadli, u-Eleazar Rodgers, ohlukane neBidvest Wits, Linda Bengu, owayedlalela AmaZulu noDevon Saal, oxoshwe yiMaritzburg United ngemuva kokuchapha ngenhlamba umqeqeshi uFadlu Davids ngesizini edlule.
I-Ea Lla Koto izovula isizini neChiefs emdlalweni weMTN8 ebhekwe ukuthi iqale ngempelasonto yokuqala ka-Agasti. U-Eymael uhole iqembu lawina indebe yeNedbank Cup nokulifake emqhudelwaneni iCAF Confederation Cup ezohambisana kuwona neChiefs eqede endaweni yesithathu ye-log ye-Absa Premiership.
“Sikhulumile mayelana nokwenza okungaphezulu ngesizini ezayo kodwa asikayiqedi imininingwane. Akulula ukuphinda okwangesizini edlule. Ukwenza lokho sekuvele kunzima ngeqembu elingenasimanga njengaleli. Kodwa ukuyiphinda kunzima ngokuphindwe kayishumi. Sizoqala ngomdlalo onzima neChiefs kwiMTN8 emuva kwalokho siya kuMaZulu. Sizozama ukuqala kahle kwiligi njengomuntu wonke ngoba kungcono ukuthola amaphuzu kusakhanya. Sizobona ukuthi simelana kanjani nesimo ngoba manje kufanele sidlale iMTN8, iligi, Telkom Knockout, Nedbank Cup neConfederation Cup ekupheleni kukaNovemba futhi umdlalo unzima. Kodwa sizozama ukushintshanisa abadlali ukuze sithole imiphumela,” kusho u-Eymael.