Amahloni amaProteas ekhishwa enze u-73
BASWELE umgodi wokucasha abamaProteas ngesikhathi beziphoxa eGalle, eSri Lanka, bekhishwa bonke besenze amarun awu-73 emdlalweni we-Test yokuqala.
Lokhu kubhubhudlwa yiSri Lanka kucacise ukuthi inkinga yeminyaka yokudlala i-spin isekhona kumaProteas yize abaningi becabanga ukuthi u-Otis Gibson ufike wayixazulula. AmaProteas akhishwe enze u-73 kade enze 126 kwi-innings yokuqala.
UDilruwan Perera ubezitamuzela kumaProteas njengoba egcine ethathe amawikhethi ayisithupha. Omunye umdlali obenza abadlali bamaProteas babukeke njengama-amesha uRangana Herath.
Bathathu kuphela abadlali bamaProteas abenze ama-run angaphezulu kwayishumi. Bonke abebeqoqa amadada nalaba abebephuma bengakafiki eshumini bebekhishwa wukuzama ukuhlasela i-spin soHerath noPerera okwenza kucace ukuthi kusekude phambili ngokudlala i-spin. Umdlali wama-Proteas oshaye ama-run amaningi ukubedlula bonke ngawu-22 nguVernon Philander.
Abadlali abaphoxile nguDean Elgar okufane nokuthi uzikhipha yena noHashim Alma okhishwe ezama ukwenza into angakaze azelwe yona ukulahla ibhola ngaphandle kwenkundla. U-Amla ulandelwe eduze uTemba Bavuma naye ongene emgogweni ofanayo.
Abeziwela ubuthaphuthaphu amawikhethi emuva kokuba uPerera ephonsele uHerath ibhola. Abadlali abathathu bamaProteas abakhishwe sekushwiba uHerath benze ama-run awu-11 bebonke.
“Size emdlalweni sazi ukuthi amaProteas anenkinga ngokudlala i-spin. Kusithusile nokho ukuthi kube lula kanjani ukuthi senze konke ebesizimisele ukukwenza. Inkundla ivuna thina abe-spin ngakhoke besizitshela ukuthi amaProteas azofika ekulungele lokho,” kusho uPerera sakuqhosha ngemuva komdlalo.
Ukaputeni uFaf du Plessis obekuwusuku lwakhe lokuzalwa uthembise okwehlukile kwi-Test yesibili eseColombo ngoLwesihlanu.
“Noma ngabe besizilungiselele kangakanani kodwa indlela iSri Lanka eshwibe ngayo besingeke siyilungele ngokwanele. Ngiyakhala kodwa ngokumanziswa kwenkundla ngoba kube nomthelela kanti lokhu kwenziwe ngaphandle kokuthi saziswe. Sizobhukula kweyesibili i-Test,” kusho uDu Plessis.