Intukuthelo ngokunqamuka kukagesi
UVUKE umbhejazane umphakathi waseCato Manor izolo ukhala ngokuthi sekuphele izinsuku ezimbili ugesi ungekho.
Kunezinsolo zokuthi umphakathi wabulala isigubhu sikagesi nokusolwa ukuthi kungaba iyona imbangela yokuthi ungabi khona.
Ubethukuthele egane unwabu usomabhizinisi wasendaweni uMnuz Bongani Madida othe ukhathele wuhulumeni oyishaya indiva indaba yabo yokungabi nezidingo ezibalulekile. Eqhuba uMadida uthe nodaba lokuthi bashisa izigubhu zikagesi kungamanga.
“Udaba lokuthi thina sishisa izigubhu zikagesi alukho, lokhu kusaqhubeka namanga asuka kuwona lo hulumeni wenu, sicishwe yiwona isigubhu. Sikhathele ukuzwa ngohulumeni ofuna sigubhe usuku lukaMandela olungasisizi ngalutho, usuku lukaMandela lwenzelwa bona ukuthi bathole imali, bayiphe abelungu koMhlanga.
“Thina njengabahlali baseCato Manor savota kodwa ayifiki intuthuko la endaweni yethu, asinazo izinto eziyisidingo njengogesi namanzi. Kusukela ngo1994 asikatholi lutho esathenjiswa yona njengoba ubona namanje le ndawo isagcwele imijondolo, ” kuchaza uMadida.
Okhulumela Abahlali Basemjondolo eCato Manor naseBonela, uMnuz Mlungisi Mokoena, uthe babhikishele ukuthi sebenesikhathi benganakwa kodwa ikhansela lendawo nohulumeni abayilandeli indaba yabo.
“Ikhansela uMnuz Warren Burne, akezi uma simbiza azolalela izidingo zethu yingakho size saphuma izolo ebusuku seza emgwaqweni sazobhikisha.”
UMokoena uphinde waveza ukuthi ngesikhathi bebhikisha ebusuku amaphoyisa adubule amadoda amabili. “Sidutshulelwe ama-comrade amabili izolo ngesikhathi kubhikishwa bedutshulwa amaphoyisa kodwa ikhansela lendawo uMnuz Burne alifiki lizosibona lifika ngoba sesifika namaphoyisa. Ikhansela elinjani elingafiki lizobona abantu balo?” UBurne uthe ugesi endaweni ucishwa ukuthi isigubhu esihambisa wona endaweni sadubuleka. ‘Ngokwazi kwami, ugesi uhanjiswa ngukuthi kwadutshulwa isigubhu sasendaweni, esihambisa ugesi kodwa usubuyile,” kuchaza uBurne.
Uthe indawo yaseCato Manor/ Bonela isigcwele kakhulu ngoba yena ngokwazi kwakhe kwakuvumeleke abantu abantu abawu-30 ngokusho kwencwadi ephuma enkantolo kodwa manje isibalo sesinyukile saba ku-300 ngoba akukho lula ukusiza wonke umuntu kule ndawo ngoba imijondolo inyuka ngosuku.
UBurne uphethe ngokuthi akaze angezi kubantu uma bemdinga ngoba nasocingweni uyatholakala.
Uthe uyazwelana nabantu kodwa akukho lula ukubasiza ngoba imijondolo eqhubeka nokwanda kule ndawo ihlukumeza abantu abaningi endaweni.