Iseyinkinga eyokuhushula izisu
ABANTU besifazane basanenkinga yokuthola usizo oluphephile lokuhushula izisu njengoba namanje kusenesibalo esiphezulu sabesifazane abasahushula izisu ezikhungweni ezingagunyaziwe ukwenza lo msebenzi.
Kukholakala ukuthi zilinganiselwa ku-260 000 izigameko zokuhushulwa kwezisu okuthiwa zenziwa ezikhungweni ezingekho emthethweni eNingizimu Afrika. Lokhu kusanda kuvela engqungqutheleni eyaziwa ngeAbortion and Reproductive Justice: The Unfinished Revolution III ebikuleli ebidingida izinkinga abahlangabezana nazo abantu besifazane uma bezama ukuyothola izinhlelo zokuhushula izisu nokunye.
Umbiko we-Amnesty International wango-2017 usanda kuveza ukuthi yize sekuneminyaka engu-21 kwaphasiswa umthetho ovumela abesifazane ukuthi bazithathele bona isinqumo sokuhushula izisu kodwa ziseziningi izinkinga.
Ngokusho kwalo mbiko, zingaphansi kuka-7% izikhungo zezempilo zikahulumeni ezihlinzeka ngezinhlelo zokuhushula izisu ezikhungweni ezingu-3 880.
Lesi sibalo singaphansi kakhulu kunesibalo sezikhungo ezingu-505 uhulumeni ahlele ukuthi zenze lo msebenzi eNingizimu Afrika.
Yize ukuhushulwa kwezisu kusemthethweni kuleli, kukholakala ukuthi izigameko eziphakathi kuka-52% kuya ku-58% zenziwa ezikhungweni ezingekho emthethweni.
Ingqungquthela ebingesonto eledlule e-Eastern Cape, obekukhona kuyona abantu abalinganiselwa ku-285 basemazweni angu-26 emhlabeni wonke, ilandela eyayiseCanada ngo2014.
Imibiko yakamuva yoMnyango wezeMpilo KwaZulu-Natal ikuvezile ukuthi abantu besifazane bagcina benezinkinga ngenxa yokuhushula izisu ezikhungweni ezihushula izisu ngokungemthetho.
Lokhu kugcina kuholele ekutheni abantu besifazane babe nezinkinga ezehlukene okubalwa kuzo ukulimala kwesibeletho, ukuphuphuma kwezisu nokunye.
Umbiko wakuleli weSaving Mothers wango-2012 uveze ukuthi abantu besifazane abangu-186 abaphuphunyelwe yizisu balinyalelwa nayizibeletho ezikhugweni zikahulumeni.
UMnuz Jacques van Zuydam, ongumqondisi jikelele wezokuthuthukiswa kwabantu kuMnyango wezokuThuthukiswa koMphakathi kuzwelonke uthe kubajabulisile ukuba yingxenye yengqungquthela. Uthe ngesikhathi bebheka izinhlelo ezifakwe emuva kwengqungquthela i-International Conference on Population and Development Programme of Action ebiseNingizimu Afrika ngo-2014 bathole ukuthi ziningi izingqinamba ezikhona kuleli okufanele babhekane nazo ukuze baqinisekise ukuthi amalungelo abantu okuhlela aba yinto ekhona ngempela (awagcini ngokubhalwa phansi).
“Izinkinga zokungalingani kwabantu ngokobulili, ngokwezezimali nangokwendlela umphakathi oyiyona ziyaqhubeka nokucindezela amalungelo okuhlela abantu besifazne. Ngo-2015 iKhabhinethi yaseNingizimu Afrika yanquma ukuthi amalungelo abesifazane okuhlela abe kulawo amqoka emigomeni yakuleli,” kusho uVan Zuydam.
Uthe la malungelo ayehlanganisa namalungelo entsha okuhlela nokusungulwa kwemithetho ezosiza ekutheni amalungelo afezwe ngendlela kuzo zonke izindawo.
Ingqungquthela beyihlelwe yizinhlaka ezehlukene okubalwa kuzona uMnyango wezokuThuthukiswa koMphakathi kuzwelonke, uphiko olwaziwa ngeCritical Studies in Sexualities and Reproduction Research Programme olusesikhungweni semfundo ephakeme iRhodes University nabanye.
USolwazi Cathi Albertyn ongusolwazi kwezomthetho esikhungweni semfundo ephakeme i-University of the Witwatersrand uthe imithetho ehambisana nokuhlela ihambisana nokuhlinzekwa kwezinhlelo zokuhlela.
“Abantu besifazane bayadinga ukuthi banikwe indawo yabo emphakathini nakwezezimali nasekutheni bazikhethele izinhlelo zokuhlela. Abesifazane badinga ukunikwa inkululeko yokuthi bazikhethele ngabakwenza emizimbeni yabo,” kusho uSolwazi Albertyn.
Ngo-2015 iKhabhinethi yaphasisa uhlelo olubhekele izinhlelo ezithinta amalungelo okuhlela ezibandakanya intsha, iNational Adolescent Sexual and Reproductive Healthand Rights Framework Strategy (2014-2019).
UVan Zuydam uthe uhulumeni uzimisele ngokuqhubeka nokulwa le mpi nokusabalalisa ivangeli lokulwela amalungelo abantu besifazane okubalwa kuwo amalungelo okuhlela nakwamanye amazwe.
Uthe bazimisele ukwenza konke okusemandleni ukuqinisekisa ukuthi amalungelo abesifazane okuhlela ayahloniswa.