UJali ethubeni lokubonakala edlala koweCAF
KUNGENZEKA ukuthi namuhla kubonakale u-Andile Jali edlubhe okokuqala imibala yeqembu lakhe elisha iMamelodi Sundowns uma selidlala koweCAF Champions League.
ISundowns izodudulana ne-AS Togo-Port yaseTogo namuhla ngo-3 ntambama eLome emdlalweni kaGroup C.
Izolo le njini ifake i-video ekhasini layo kwiTwitter beziqeqesha iveza ukuthi sebewulungele umdlalo.
UJali usayine inkontileka yeminyaka emihlanu neSundowns esuka eBelgium kwi-KV Oostende ebese ihlale khona kusukela ngo-2014.
Ufika eChloorkop nje unaso isipiliyoni sokuyibamba emidlalweni yeChampions League njengoba ngo-2013 adlala kowamanqamu alo mqhudelwano esakwi-Orlando Pirates lapho bahlulwa khona yi-Al Ahly yase-Egypt.
ISundowns iya emdlalweni idinga wonke amava abadlali bayo kwazise iyibambe endaweni yesithathu eqoqweni ngamaphuzu amabili emidlalweni emibili.
IWydad Athletic Club Casablanca yaseMorocco neHoroy yaseGuinea, nabo abadlala namuhla ntambama, bayalingana ngamaphuzu amane. Amaqembu amabili azoqeda phezulu
ngemuva kwemidlalo yamaqoqo azodlulela kuma-quarterfinal. Nyakenye iSundowns ikhishwe yiWydad sekusele amaqembu ayisishiyagalombili kulo mqhudelwano eyawunqoba ngo-2016. “Kumnandi ukuthi ngibuyile futhi ngidlalela iqembu elikwiChampions League. Iyona into engifua ukuyiwina. Kwakungemnandi ukuhlulwa kowamanqamu. Sengizitshelile ukuthi nesami isikhathi siyeza,” kusho uJali kwi-website yeSundowns. UJali kwiSundowns uzohlangana no-Oupa Manyisa ojoyine iqembu ngesizini edlule. Laba badlali bake baba yizinkunzi ezesatshwayo belawula isisu sePirates ngesikhathi iwina izicoco ezintathu amasizini elandelana baze bayofika kowamanqamu weChampions League. Nokho ngaphansi kobuholi bukaPitso Mosimane kumaBrazilians kumele balwele ukugudluza ukaputeni uHlompho Kekana noTiyani Mabunda okuyibona ababamba le ndawo. ISundowns kumele iqale impilo ngaphandle kukaPercy Tau noKhama Billiat asebelishiyile iqembu. Laba badlali bakubadlali abebephambili iDowns inqoba izicoco eminyakeni edlule. UBilliat usezogijima kwiKaizer Chiefs kanti uTau usalinde ukuthi kuphumelele ukudayiswa kwakhe kwiBrighton & Hove Albion yaseEngland. Uma isibuya eTogo izodlala neChiefs kwiShell Helix Ultra Cup eFNB Stadium ngo-3 ntambama. NgoJulayi 27 izokwamukela iTogo-Port emzuliswaneni wesibili weChampions League.