ITheku emkhankasweni wokuvumbulula abanekhono
UMASIPALA waseThekwini usemkhankasweni wokuzivumbululela ngokwawo abadlali abazogcina beyizilomo nezihlabani zangomuso emidlalweni eyehlukene.
UThembinkosi Ngcobo oyinhloko yezeMidlalo, ukuNgcebeleka naMagugu kuMasipala iTheku, wethule i-Ethekwini Games ezokuba kule mpelasonto.
Imidlalo izoba sezinkundleni ezehlukene ngoMgqibelo nangeSonto. Iqala ngo-8 ekuseni kuya ku-4 ntambama.
UNgcobo ekhuluma emcimbini wokwethula le midlalo izolo eMoses Mabhida Stadium, uveze ukudumala kwakhe ngokungabi khona kweBafana Bafana kwiNdebe yoMhlaba esongwe ngempelasonto eRussia kunqoba iFrance.
Uthe isihlava sokungakwazi ukuba namaqembu amela izwe ezingeni lomhlaba akuyona inkinga kanobhutshuzwayo kuphela.
“KwiNdebe yoMhlaba iFrance ngelinye lamaqembu abenabadlali abasebancane. Omunye wabo oneminyaka engu-19 (uKylian Mbappe) uphule irekhodi ebese lime iminyaka eshaya igoli kowamanqamu. Le Ndebe yoMhlaba iphinde yaveza obala ukungabi khona kweNingizimu Afrika enanerekhodi elibi lokuphuma kuqala ibe ingosokhaya.
“Ukungabi khona kweNingizimu Afrika emiqhudelwanweni yomhlaba kuyinkomba yokunganakekelwa kwethalente kubadlali abesabancane. Namuhla sithi siqala indima yokuqeda konke lokho. Sifuna ukulungisa amaphutha edlule. Eminyakeni eyishumi ezayo sifuna ukubona abanye babadlali abaqhamuke lapha besimele njengezwe,” kusho uNgcobo.
Imidlalo izobe iphakathi kwezifunda eziyishumi zeTheku ahlukaniswe amaqoqo amabili.
Kuzobe kudlalwa ezokusubatha, ibhola lezinyawo, isibhakela, i-chess, ikhilikithi, i-basketball, igalofu, i-netball, i-karate, ibhola lombhoxo, ama-indigenous games, ukubhukuda ne-tennis.
La maqembu aqhamuka kumawadi angaphansi kwaseThekwini okuqale kwahlungwa kuwona.
Akhiwe abadlali abaneminyaka engaphansi kuka-19.
Amaqembu azophuma lapha yiwona azoya komela iTheku kumaSalga Games ngasekupheleni konyaka.
UNgcobo uthe ngeke besavumela ukuthi kube khona oqokelwa ezikwatini zamaSalga ebe engakaze adlale kumawadi.
Uthe ukuze bakwazi ukugcina ithalente futhi balinakekele basebenzisana nezinhlangano zezemidlalo ngokuhlukana kwazo.
“Sifuna laba badlali baziwe yizinhlangano ukuze banakekeleke ngendlela. Kuthi noma kukhona abababonayo sazi ukuthi ngeke baxhashazwe basayiniswe izivumelwano ezizogcina zibacindezela,” kusho uNgcobo. Imidlalo imi kanje: NgoMgqibelo: Athletics (Chatsworth Athletics Stadium); Basketball (Hoy Park); Boxing (Olive Convention Centre); Chess (Marquee Hoy Park); Cricket (Stroma Road Grounds); Dance (The Station Hall); Football (Cato Manor Hoy Park); Golf (Windsor Park Golf Course); Indigenous Games (Hoy Park); Karate (Olive Convention Centre); Netball (Hoy Park); Rugby (George Campbell & Kings Park Outdoor); Swimming (Bayview Swimming Pool); Table Tennis (The Station Hall); Tennis (Hoy Park); Volleyball (Hoy Park).
NgeSonto: Netball (Hoy Park); Volleyball (Hoy Park); Basketball (Hoy Park); Football (Cato Manor Hoy Park).