UMorton uncoma isenzo soSuthu ngoBhele noKhenyeza
UZISHAYA isifuba ngokuba kuMaZulu uMichael Morton othi ubuhlakani obukhonjiswe ngabaphathi bakhe bevuselela izinkontileka zoSiyabonga “Bhele” Nomvethe noMabhuti Khenyeza abebeqiwa yijezi bumgeze ngaphakathi.
Abagadli, osekuyibona bobabili kuphela abasagijima kwiPremier Soccer League (PSL) abanamagoli eligi angaphezulu kwawu-100, bavuselele izinkontileka zabo ngesizini eyodwa umdlali ngamunye. Nakuba isizini edlule ingazange ibe yilokhu obekulindelekile (kubona) kwazise umqeqeshi uCavin Johnson ubebuye angabaniki isikimu kodwa bekuthi njalo uma bedingeka nezingqondo zabo ezindala bavele ngaso sonke isikhathi.
Bobabili abagadli baKwaZulu-Natal abaconsi phansi kubathandi beqembu abahlale njalo bewa bevuka nalo. Ngesizini edlule uNomvethe, oseke wadlala nase-Europe (Italy naseDenmark), ushaye amagoli amabili ngesizini eyodwa kwathi uKhenyeza yena washaya amane.
Ngesikhathi ekhuluma emcimbini wokwethulwa kukadeda ngendlale wesitolo sakwa-Adidas eGateway Mall, eThekwini, ngoLwesihlanu uMorton, uthe indlela iqembu lakhe elisayinise ngayo ikhombisa ukuqonda ukuthi yini inqubekelaphambili.
USuthu luqinisekise ukusayiniswa koNomvethe noKhenyeza lase liveza nabadlali abasha o-Emiliano Tade wase-Argentina, Nhlanhla Vilakazi (Free State Stars), Moeneeb Josephs (Bidvest Wits), Marc van Heerden noCharlie Hlalele (Orlando Pirates), Xolani Silawula (Uthongathi FC noBoiki Modikaseng obekuPlatinum Stars.
“Indlela iqembu elisayinise ngayo isikhombisile singabadlali abadala ukuthi siya phambili. Amanye amaqembu asayinisa abadlali baze beqe eshumini. Lokhu kuyakuhlakaza lokhu okusuke kwakhiwe ngesizini esuke idlule. Ngesizini edlule bonke abantu bebesibheke ekutheni sivike izembe kodwa bheka manje siku-Top 8 (uma bengeke basikhiphe njengoba benza),” kusho uMorton oseke wagijima kwiOrlando Pirates, Mariztburg United neSuperSport United.
“Kuhle ukusayinisa ngoba usuke uqinisa lapho udinga khona hhayi ukwenza ngoba ubona abanye. Ngizishaya isifuba ngokuba wumdlali woSuthu futhi ngijabule ngakho konke okwenziwa yiqembu lami. Kukhona konke kodwa abadlali okuyibona okungijabulise kakhulu ukusayiniswa kwabo oBhele (Nomvethe) noMabhuti (Khenyeza). Ukuba khona kwabo eduze kwethu ngaso sonke isikhathi kusenza abadlali abangcono njalo.”