Seluzimele kuthelevishini uhlelo lukaVVO
SINYELWE yinyoni esandleni isazi samasiko uVelaphi ‘VVO’ Mkhize njengoba uhlelo lwaso olukhonjiswa esiteshini i-Afro Worldview (Dstv 405), Umsamo Encounters, sekuwuhlelo oluzimele.
Lolu hlelo oluqale ngenyanga edlule lubheka kabanzi amasiko nezinto ezithinta inkolo. Ngesikhathi luqala belungena ngaphansi kohlelo i-Africa Tonight.
Ekhuluma ngalezi zinguquko uVVO uthe, kusho lukhulu kubona njengoba uhlelo lukhombisa ukukhula. “Sibonga umphathi walesi siteshi uMzwanele Manyi ngokuvumela lolu hlelo luqale ukukhonjiswa kulesi siteshi. Belungaphansi kwesigaba sohlelo olukhonjiswa nsuku zonke ebusuku, ngo-9. Lolu olwethulwa yimina lungena ngoMsombuluko ngo-9.05 luphele ngo-10, ebusuku.”
Uthe njengoba selunezinguquko alushintshile isikhathi kuphela kodwa ukuzimela kwalo yikhona okujabulisayo. “Ekuqaleni bekunzima ukuthi kuphinde isiqephu ebesikhonjiswa ngoMsombuluko kodwa manje sesizophinda njalo ngoMgqibelo ngo-4.30 siphele ngo-5.30 ntambama. Okunye okujabulisayo ukuthi zisuka nje lolu hlelo lube nababukeli abangaphezu kuka-200 000 okusho lukhulu kithi nasethimbeni esisebenza nalo lophrojusa okukhona kulo indodana yami.”
Uthe kuye njengomsunguli wohlelo lokhu okwenzekayo kumenza athobeke. “Ngisho kusaphethe uhulumeni wobandlululo akukaze kube nohlelo olufana nalolu kuthelevishini ngisho sekuphethe owenkululeko, kuyaqala ukuthi kube nohlelo oluyigugu kwabaningi njengoba kukhona abakufundayo.”