U-Obama ukhala ngobandlululo olusadla lubi kuleli naseMelika
LOWO owayenguMengameli wase-USA uMnuz Barack Obama ukhala ngokuthi lusadla lubi ubandlululo lapha eNingizimu Afrika naseMelika.
Ekhuluma ngesikhathi ethula isifundo ngoMengameli wokuqala wentando yeningi kuleli uDkt Nelson Mandela eGoli izolo, u-Obama ucaphune uMdiba owathi akekho umuntu owazalelwa ukuthi azonde abanye abantu bezinye izinhlanga.
“Uthando luyimvelo, kumele singabantu sibe nothando ukuze sikwazi ukuhlalisana kahle singacwasani,” kusho u-Obama.
Uthe yena ukholwa ukuthi bonke abantu bayalingana nokuthi banamandla alinganayo. “UMandela wasifundisa ukuthi ukuze intando yeningi yenzeke kahle, kumele abantu bakwazi ukuxoxisana ngisho nabantu abanemibono ehlukile kweyabo, yingakho nangesikhathi esejele waqhubeka wafunda ulimi lwesiBhunu, okuwulimi lwabantu abambopha.”
Uthe abantu kumele baziqhenye ngobubona bafane noMandela ongazange wazinyeza ngokuthi umnyama. Uthe intando yeningi ibafundisa ukuthi kumele basondelane nomphakathi. “Intando yeningi ingaba
Myinhle futhi iphinde ikhathaze, lokho ngiyakwazi.”
Uthe ukuze intando yeningi igcineke kahle emazweni kumele kuvalwe igebe eliphakathi kwabadla izambane likapondo nabadla imbuya ngothi. Uthe ukuze kuqhutshekwe nephupho likaMandela lentando yeningi, abantu kumele bahlakaniphe baphinde baqine.
Uchaze uMandela njengomunye wabahamba phambili emzabalazweni wokukhulula abantu kwingcindezelo e-Afrika.
Enye into u-Obama akhale ngayo ukungabikhona kobulungiswa. “Umzabalazo wokulwa ngokuthi kube khona ubulungiswa awukapheli, kusamele sisebenze kanzima ukuze siwunqobe.” Uthe lonke uhlelo lokucwasana emhlabeni kumele luchithwe.
Uphinde wakhuluma kabanzi ngenzikamnotho eyahlasela umhlaba ngo-2008, wathi yandisela izinkinga abantu abahluphekayo.
Ukhulume nangodaba lokuhwebelana kwamazwe omhlaba athi belucindezela amazwe ahluphekayo. Lo mcimbi ubuhanjelwe izicukuthwane okubalwa kuzo abake baba omengameli, kukhona neSilo samaBandla uGoodwil Zwelithini.