Kumiswe imenenja yomgwaqo ka-R11m
ISIMISIWE emsebenzini iMenenja kamasipala waseJozini ngemuva kokukhala kwamakhansela ngo-R11 million osebenze kwakhiwa umgwaqo oyikhilomitha elilodwa eMkhuze nezigidi ezintathu zokulungisa amahhovisi omkhandlu.
UMnuz Kuhle Khumalo umiswe ngoMsombuluko ebusuku ngo-9 ngemuva komhlangano wamakhansela obusemini. Umiswa nje bese kuqalwe uphenyo olwenziwa yiMunicipal Public Account Committee (MPAC) oluqalwe ngesonto eledlule.
UKhumalo utshele Isolezwe izolo ukuthi akukho okuningi azokusho ngoba usaxhumana nabameli bakhe.
“Ngithole i-SMS ngo-9 ebusuku ngoMsombuluko ebingazisa ukuthi sengimisiwe emsebenzini ngakho ngizocela imibuzo uyibhekise kwimeya ngoba mina ngimatasa ngixhumana nabameli bami ngalesi simo,” kusho uKhumalo.
Ngesonto eledlule Isolezwe libike ngenkombankombane yaseJozini ephakathi kwamakhansela noKhumalo ngokusebenza kwezigidi zabakhokhi bentela.
Amakhansela kaKhongolose nawe-IFP abeshaya amakhala ngemali yokwakha umgwaqo waseMkhuze abasola ukuthi imali yasetshenziswa budedengu.
Amakhansela abuye asole uKhumalo ngokuthi “wadla” u-R3 million wokwakha amahhovisi kamasipala.
Kuthiwa wanikeza usonkontileka imali umsebenzi ungakakhangiswa.
Kuthe uma umsebenzi sekufanele uqale kwavela ukuthi usonkontileka akasakwazi ukuqhubeka ngoba imali idliwe uSars.
UKhumalo ngakolunye uhlangothi uyacacisa ukuthi isinqumo sokwakha umgwaqo ngo-R11 million sathathwa emhlanganweni womkhandlu owawungomhla ka-12 Meyi 2017 lapho iMeya, uDelani Mabika, yasayina ukuba kwengezwe u-R3 million ku-R8 million okwakufanele wakhe umgwaqo.
UKhumalo usola ukuthi umiselwe ukulwa nenkohlakalo eJozini.
Uveze ngesonto eledlule ukuthi wavula icala koKlebe ukuze baphenye amanye amakhansela ngokunyamalala kuka-R5 million okwakuhlelwe ukuba kwakhiwe izakhiwo ezithile zomphakathi. Le mali kuthiwa yasayinelwa njengesebenzile kodwa izakhiwo azikaze zibe khona.
IMeya yaseJozini uMnuz Delani Mabika ithintwa iqale yaba namancoko yathi ivukwa wumoya ngalolu daba.
“Ngicela ungithinte emuva kwemizuzwana ngoba ngibheke eHluhluwe emhlanganweni ophuthumayo. Uma ungangithintanga kuqala nami ngizobuyela kuwe,” kusho uMabika.
Kuthe ngemuva kwemizuzwana abeyibekile wathintwa kodwa ucingo lwakhe belumatasa. Ngemuva kwalokho beseluvaliwe kwaze kwashaya isikhathi sokushicilela engatholakali.
Kwenzeka lokhu nje Isolezwe lithunyelwe umyalezo okhomba ukuthi ubuvela kuKhumalo ewuthumele kubaholi abathile bezombusazwe ebalisa ngesimo abhekene naso.
Umyalezo uKhumalo uyawuphika uthi akawazi futhi akekho umholi amthumelele.
Kulo myalezo kubhalwe ukuthi: “Laba bantu bafuna ukungimisa emsebenzini bangesulela ngezinto engingazazi. Bagxambukela nasemsebenzini wami. Bafuna kubenabasebenzi engibaxoshayo noma ngibehlise ezikhundleni ukuze kungene abafunwa yibo.”UKhumalo uthe akawazi lo myalezo kanti uqale ukusabalala emasontweni amabili edlule.