Umasipala nesicelo emakhasimendeni
UMASIPALA weTheku sewunxuse amakhasimende awo ukuthi abhalise ohlelweni oluzosiza ekutheni athole izincwadi zezikweletu nge-internet njengoba kunezinkinga eposini.
Bathe lokhu kungenxa yokuthi banenkinga yokuhambisa izincwadi kumakhasimende abo ngenxa yesiteleka esiqhubekayo eposini.
UNksz Khanyi Gama oyiphini lenhloko lezindaba ezithinta amakhasimende uthe bayakuqonda ukuthi kunamakhasimende angazitholile izincwadi zawo. “Sisebenzisa iposi ukuze sithumelele amakhasimende ethu izincwadi. Siyazi ukuthi kukhona amakhasimende angazitholile izincwadi futhi siyawanxusa ukuthi abhalise ohlelweni lwethu olwaziwa nge-e-Service ngoba luyashesha, futhi lusebenza ngendlela, aludingi namaphepha,” kusho uNksz Gama.
Uthe amakhasimende angathinta umasipala uma efuna ukuthola izincwadi zawo ezicacisa ngokuthi kufanele akhokhe malini uma zikhokhela amanzi nezinye izidingongqangi.
UNksz Nobuhle Njapha weSouth African Post Office uthe ukulethwa kwezincwadi zezikweletu zamanzi nezinye izidingo-ngqangi ezihlinzekwa umasipala kuzothatha isikhathi ngenxa yesiteleka esiqhubekayo eposini. Uxolisile emalungwini omphakathi aphazanyiswe yisiteleka.
UNksz Njapha uqhube wathi izincwadi zihleli ezikhangisweni zabo ezahlukene futhi kuzothatha izinsuku ezingu-20 ukuze zihlungwe ngendlela.
Amalungu omphakathi afuna ukubhalisela uhlelo lwe-e-Service angabhalisa ku: https://eservices. durban.gov.za/v2/ noma athumele imibuzo ku: http://correspondence. durban.gov.za:200/