Yethembisa imihlomulo iBRICS kosomabhizinisi
INXUSA leNingizimu Afrika kwiBRICS, uSolwazi Anil Sooklal, lithi maningi amathuba okukhulisa umnotho wakuleli namabhizinisi amancane eza nobuhlobo beBrics.
USooklal ubekhuluma emcimbini weBRICS Business Council, obuseRichards Bay Industrial Development Zone (RBIDZ), eRichards Bay izolo.
Uthe iBRICS okuyisigungu samazwe afuna ukuthuthuka kwezomnotho ahlanganisa iNingizimu Afrika,Brazil, India, China neRussia, kuningi okuzuzwa yiNingizimu Afrika ngokuzifaka kulesi sigungu.
“Baningi abantu abangakuqondi ukubaluleka kweBRICS kodwa ngifuna ukubakhumbuza ukuthi ibalulekile kakhulu ngoba kuyimanje sihwebelana namazwe eBRICS ngemali efika ku$450 billion. Abantu esihwebelana nabo kakhulu yiChina esingenisela uR300 billion, kulandele iBrazil ngo$107 billion bese kuza i-India ngo $30 billion kugcine iRussia ngemali engaphansi kuka $10 billion,” kusho uSooklal.
Uthe indikimba yalo nyaka igxile kwi-4th Industrial Revolution, uguquko lwezomnotho nezolimo ukuze kuqinisekiswe ukuthi abantu abaphelelwa wukudla.
Uthe iNingizimu Afrika izophatha izinhlelo zeBRICS Business Council kuze kube wuDisemba nonyaka njengoba uDkt Iqbal Surve, onguSihlalo we-Independent Media, eziphethe kahle izinhlelo zayo ngobunono.
“Ngicela abantu bawathathe amathuba eza neBRICS Business Council ngoba akhona, yithina esingawathathi. Kuyimanje kuneBRICS Bank esibolekise ngo $5.1 billion ezinkampanini zohulumeni bamazwe eBRICS. Inabasebenzi abangu-100 kanti eNingizimu Afrika amahhovisi ayo aseSandton. Kufanele thina sifune ulwazi,” kusho uSooklal.
UMnuz Sello Rasethaba oyilungu le-BRICS Business Council, uthe ukuza kwayo eThekwini ngesonto elizayo kuzothuthukisa osomabhizinisi abancane ngokubahlanganisa nezinkampani zamazwe eBRICS.
“IBRICS Business Council yasungulwa ngo-2013 kanti kulo nyaka yonke imicimbi yayo izobe iseThekwini naseGoli. Kube nombango phakathi kweTheku neCape Town, kubangwa ukuthi yiliphi idolobha okufanele libe nomcimbi weBRICS kodwa kwaphumelela iTheku. Ibalulekile imicimbi yeBRICS Business Council ngoba iletha ohulumeni bamazwe eBRICS abahambisana nezikhulu zezinkampani ezizothenga imikhiqizo yosomabhizinisi abancane. Lokhu kusho ukuthi osomabhizinisi basemalokishini nasezindaweni zasemakhaya bazohlomula ngoba kuzoba nombukiso wamabhizinisi nezingxoxo ezihlukene eNkosi Albert Luthuli International Convention Centre (ICC),” kusho uRasethaba.
Uthe akangabazi ukuthi ngesonto elizayo, uMengameli Cyril Ramaphosa, uzokwazi ukuwuhlanganisa u$60 billion njengoba kuza uhulumeni waseChina ozimisele ukutshala imali eningi futhi owaseRussia, India nowaseBrazil akangabazi ukuthi uzotshala imali ethe xaxa.
“IBRICS Bank izophinde ithule uhlelo etshale kulo imali ukukhombisa ukuthi ikhona futhi abantu bangayisebenzisa uma beyidinga,” kusho uRasethaba.