Sekuyonquma izithunywa kweyaseKZN
UMDIDIYELI we-ANC KwaZulu-Natal, uMnuz Mike Mabuyakhulu, uthe izithunywa zenhlangano ezizonquma ukuthi kuzoba nomncintiswano wezikhundla noma cha engqungqutheleni yokukhetha ubuholi obusha besifundazwe ezoba seSport Centre eDUT eThekwini kuleli sonto.
Ingqungquthela ye-ANC esifundazweni izoqala ngoLwesine iphele ngoMgqibelo.
Esithangamini nabezindaba eThekwini izolo, uMabuyakhulu uthe yize bebefisa ukuthi ubuholi obuzokhethwa bufake zonke izinhlangothi njengoba bakha ubumbano kodwa izithunywa ezizonquma ukuthi ingqungquthela izohamba kanjani.
“I-ANC inezinhlelo zayo zangaphakathi zokwenza izinto, asifuni ukuthi sicindezele lezo zinhlelo ngezinto ezifiswa yithina,” kusho uMabuyakhulu.
UMxhumanisi we-ANC esifundazweni uMnuz Sihle Zikalala, uthe amalungiselelo engqungquthela ahamba kahle, wathi ababoni ukuthi kukhona okungayiphazamisa.
“Zonke izikhalo ebezikhona ebezifakwe ngamaqabane sezixazululiwe, kanti futhi sihlanganile namaqabane abenganeme aze afaka inhlangano enkantolo savumelana ngokuthi akusetshenziswane ukuze kubunjwe inhlangano ikakhulukazi njengoba kubhekwe okhethweni lukazwelonke ngonyaka ozayo,” kusho uZikalala. Kanti uMnuz Mzwandile Mkhwanazi obengomunye wabahambisana nalabo ababefake i-ANC enkantolo nokwaholela ekutheni bugcine bungakhethwanga ubuholi obusha e-University of Zululand, ekhuluma naleli phephandaba ngoMsombuluko uthe konke sekuhamba kahle.
UZikalala noMabuyakhulu kulindeleke ukuthi bakhethwe engqungqutheleni ngaphandle kokuphonselwa inselelo.
UZikalala uphakanyiselwe esikhundleni sikaSihlalo kanti uMabuyakhulu aqokelwe ekutheni abeyisekela likaSihlalo.
Isikhundla okulindeleke ukuthi siphonselwe inselelo esikanobhala lapho obenguNobhala ebuholini obuhlakaziwe, uMnuz Super Zuma, kulindeleke ukuthi azwane amandla noMnuz Mdumiseni Ntuli obenguMkhulumeli we-ANC eKZN.
UNtuli usekwa i-ANCYL esifundazweni kanti kukhona nezinye izifunda ezinkulu ezimusekayo okubalwa kuzo iTheku, iMusa Dladla neGeneral Gizenga Mpanza obiyaziwa ngoDukuza phambilini. UZuma kukholakala ukuthi wesekwa iMoses Mabhida aphuma kuyona kanye namanye amaqabane avela ezifundeni ezahlukene.
Esinye isikhundla okulindeleke ukuthi siphonselwe inselelo esephini likanobhala kuso okuvela amagama amathathu elikaMnuz Nhlakanipho Ntombela, uMnuz Mzwandile Mkhwanazi noMnuz Sipho Hlomuka. UMkhwanazi kumanje unguNobhala we-ANC eLower South Coast kanti uHlomuka unguNobhala wenhlangano oKhahlamba. Esikhundleni sikamgcinimafa kuphakanyiswe uNkk Nomusa Dube-Ncube.