I-ANC ikhuza ukuvalwa kwemigwaqo uma kunezikhalo

I-ANC esifundeni iMusa Dladla icele abantu ukuthi bangavali imigwaqo uma kukhona abanganelisekile ngakho kodwa bakhulume nezinhlaka ezifanele ukuze kuvinjwe isimo esicishe savala inkampani enkulu iRichards Bay Minerals (RBM).

UNobhala waseMusa Dladla, uMnuz Tholi Gwala, uthe kubaphethe kabuhlungu ukuthi kucishe kwavalwa iRBM ngenxa yesiteleka sabasebenzi benkampani esebenzisana neRBM. “Siyabonga ukuthi uhulumeni uye wangenelela ukuze kuqhubeke umsebenzi eRBM ngoba bekungeke kube kuhle ukuthi abantu abangu-4 000 baphelelwe wumsebenzi. I-RBM yinkampani ebalulekile eqasha inqwaba yabantu, iphinde ivulele osomabhizinisi abancane amathuba njengoba bethola izinkontileka bese nabo beqasha abanye abantu. Siyacela ukuthi abantu bakithi uma kukhona abanganelisekile ngakho bakhulume bangavali imigwaqo.”

Uthe banezingxoxo eziqhubekayo namalungu omphakathi beyi-ANC eMusa Dladla ukuze kutholakale isisombululo kulokho.

UNdunankulu waKwaZuluNatal, uMnuz Willies Mchunu, uthe amaphoyisa azoqhubeka nokuqapha isimo eRBM ngoba le nkampani ibalulekile ingenisa uR1.3 billion emnothweni waKwaZulu-Natal ngonyaka.

NgoMsombuluko odlule kudutshulwe unogada wakwaRBM uMnuz Vusi Mhlenyane (34) kanti bese kusabalele amahlebezi okuthi kunomunye umuntu oshonile.

ULt Colonel Zwane wamaphoyisa KwaZulu-Natal uthe icala elisavuliwe ngelokushona kukanogada akekho omunye oshonile abaphenya ngaye.

Uphinde waveza ukuthi amaphoyisa aseRichards Bay aphenya icala lokudala udlame emphakathini emuva kokuthi iqulu labantu bevimbe umgwaqo u-R619 ngoMgqibelo.

UNKK Zanele Zungu obhekelele ezokuxhumana eRBM uthe abasebenzi sebebuyelile emsebenzini emuva kokuqiniswa kwezokuphepha.

Uthe bayabonga kuNdunankulu Willies Mchunu ngokungenelela kwakhe ngoba abasebenzi baqale ukubuya ngoMsombuluko (16 Julayi).

Amaphoyisa abetshalwe ngobuningi bawo njengoba Isolezwe lifice kunamaveni amathathu izolo. BHEKA IKHASI 14