Akudliwa noma yini uma usuzolala
ONGOTI bezempilo bahlala bengakukhuthazi ukudla ngaphambi kokulala kodwa kunezidlo okuthiwa akumele neze uzidle uma usuzolala. Lezi zidlo zingenza umonakalo emzimbeni nakwezempilo. Ngokombiko weHealth.com oshicilelwe nakwi-website yakhona, ezinye izidlo kumele zingadliwa sekusele amahora amathathu ngaphambi kokulala. Nazi ezinye zazo:
Ice Cream Abanye abakholwa ukuthi maningi kanjani amafutha aku-ice cream. Uma uwudla bese uyalala umzimba ngeke ukwazi ukuwugaya kahle esiswini. Ushukela okulesi sidlo nawo awukwazi ukugayeka kodwa ugcina uhlangana namafutha kudaleke umonakalo.
Ikhofi Linezithako ezine-caffeine eningi. Uma uliphuza usuzolala kunzima ukuthi bufike ubuthongo. I-caffeine yenza ukuthi umzimba ube nomdlandla ngokweqile, bungafiki nhlobo ubuthongo. Liphuze engakashayi u-3 ntambama uma ufuna ukulala kahle.
Pasta Inama-carbohydrates amaningi okungenza ukuthi wonke ashintshe abe ngamafutha emzimbeni. Ezinye izithako ezijwayele ukufakwa kwi-pasta okubalwa ushizi namafutha, zenza kwakheke kalula amafutha. Ungazithola ukhuluphala ngokushesha.
Uswidi noma ushokoledi Uma ungazimisele ukulala ebusuku, yidla uswidi noma ushokoledi. Kunezithako eziningi ezinika umdlandla ezenza ungakwazi ukulala. Ukudla iqhezu likashokoledi kungakwenza uqwashe amahora amaningi.
Garlic Liyaziwa ukuthi iphunga lika-garlic alibekezeleleki. Uma uzodla ukudla okunawo usuzolala, mancane amathuba okuthi ugayeke kahle esiswini. Lokhu kungenza ukuthi emzimbeni bese iphunga liyasabalala.
Iziphuzo ezihlohlozayo Ngaphandle kokuthi zinoshukela omningi, zinomunye umthelela omubi. Zine-acid eningi engakwenza ungalali kahle. Le acid inganyuka, ikubangele isilungulela nokuhlohloza esifubeni.