‘Ubunye bethu nabazali busihlomulisile isikole sethu’
UKUFUNDISA akusekhona ukuvula izincwadi kuphela, othisha sekumele bacubungule ukuthi umfundi ngamunye ukulungele yini ukufundiswa.
Uma engakulungele babheke ukuthi unayiphi inkinga futhi angasizwa kanjani.
Lokhu kushiwo, uMnuz Mthandeni Msomi, uthishanhloko wesikole iNomavimbela High School, eseMbumbulu.
Uthe abafundi abaningi bakulesi sikole banabazali abangasebenzi, abathembele esibonelelweni sikahulumeni ngenxa yalokhu kuyenzeka ukuthi umfundi abhekane nesimo esizodinga ukuthi abonane nosonhlalakahle.
“Uthisha ofundisa lowo mfundi okungenzeka ukuthi unenkinga kumele aqaphele indlela yokuziphatha kwalowo mfundi. Kwesinye isikhathi uba nolaka noma aziphathe ngendlela engajwayelekile. Uma kunaleso simo kumele wena thisha uhlale naye phansi eseyedwa ubuze ngokuziphatha kwakhe. Uzochaza ukuthi kwenzekani ekhaya bese siyangenelela, sihambe naye umfundi siye kubo bese simxhumanisa nehhovisi elifanele, elingamsiza. Lokho kwenza ukuthi kungabi nomfundi osilela ngemuva ezifundweni zakhe,” kusho uMsomi.
Lesi sikole sithole u-91% kumatric nyakenye, uMsomi uthe bancintisana neSibusisiwe High School okungesinye sezikole eziphasa kahle kule ndawo.
Uthe othisha bakhe bazibekela amamaki abafisa ukuthi izifundo zabo ziphaswe ngawo.
“Lokhu kwenza ukuthi uthisha ngamunye asebenze kanzima ukuze isifundo sakhe siphaswe ngalamamaki azibekele wona,” echaza.
Kulesi sikole esasungulwa ngo-1976 kufundwa isiZulu, i-English, iLife Orientation, Physical Science, iLife Science, i-Agricultural Science, i-Accounting, iMaths, iMaths Literacy neHistory.
UMsomi yize enguthishanhloko kodwa ufundisa iHistory kwaGrade 10 kuya kuGrade12 neCreative Arts kwaGrade-9.
Uthe ukufundisa kumenza ukuthi ahlale ematasatasa ngoba engafuni ukuthi isifundo sakhe siphaswe kancane ngoba ubuye angabikhona esikoleni eyolungisa izinto ezithinta umsebenzi wakhe wokuba uthishanhloko.
“Ngiyathanda ukuzibambela, kulesi sikole akekho umuntu osihlanzayo, unobhala noma unogada, abafundi bayazihlanzela amakilasi, mina ngihlanza ihhovisi lami negumbi eligcina izimpahla. Uma kufundwa ebusuku noma sinabanye abafundi abasivakashele kakhulukazi laba esijwayele ukuzoqhudelana nabo ngeMaths ngiba unogada. Kuyenzeka ukuthi kube nomuntu ozingenelayo esikoleni ophuzile ngoba ebona kukhanya, azophazamisa. Kumele ngithi noma ngikhona lapho kuqhudelwana khona kodwa ngibuye ngiphume ngibheke ukuthi akekho yini umuntu ongase asiphazamise,” kusho yena.
Uthe abafundi bakhe bayazikhandla ukuze bathole amamaki angcono yize beke baqhuzuka ngo-2016, ngokujwayelekile uthe umatric wakulesi sikole uphasa ngo-70 kuya ku80%, ngo-2016 bathola ngaphansi kwalokhu, ngo-2017 benyusa amasokisi.
“Nyakenye sizame kakhulu sathola amamaki angaphezulu kwalawa esijwayele ukuwathola, asimile sizimisele ukwenyusa izinga nakulo nyaka,”
Uma kuqala unyaka, uthe ikilasi likamatric ngokubambisana nothisha baba nomhlangano kucutshungulwe amamaki athole umatric odlule bese besho ukuthi bona bafisa ukuthi bathole amamaki angakanani.
“Ngemuva kwalokhu kubizwa umhlangano wabazali, batshelwe ukuthi ngenxa yokuthi kuhlelwe ukuthi kutholakale amamaki angaka uhlelo lokufunda luzoma kanjani.
Sisuke sifuna ukuthi umzali naye enze uhlelo lwakhe ngemisebenzi eyenziwa ngumfundi ekhaya.
Isikole singena ngo-7.45 kodwa siba ne-morning class engena ngo-7. Sinestudy esingena ngo-15.00 siphele ngo-17.00. Ngemuva komhlangano wethu nabazali kufika umhloli naye asho ukuthi yini ayilindele kulesi sikole. Lokhu kusenza ukuthi sonke sivumelane ngokuthi kumele sizibambe ziqine ukuze siphulelele,” kusho uMsomi.
Ikilasi lezoLimo uthe linengadi yamadumbe eliyitshalayo, bese kuthi amadumbe alo adayiselwa umphakathi. Lesi sikole sihamba sodwa ngokushaya ingoma esifundeni saseMlaza.
“Basazozalwa abayoshaya thina engomeni noma ngubani uyazi ukuthi siyayithela induku, sihamba size siyofika ePort Shepstone, siyoqhudelana nabanye abafundi. Siyazimisela uma sekusondele isikhathi sokuthi siyoncintisana. Amalunga omphakathi ayasondela azosilekelela ngokufundisa abafundi bethu ukuthi ingoma ishaywa kanjani nezinto ezithile ezihambisana nakho ukusinwa kwengoma,” kusho yena.
Ngenxa yokuphumelela kahle, uthe inyunyana yothisha iSadtu ibachome uphaphe lokwenyusa amasokisi ngo2017, umnyango wezemfundo wabachoma uphaphe lokuba yiMost Improved ezikoleni ezingaphansi koMlaza District ngo-2017.