Uxakekile umndeni ngelungu okuthiwa lizilengisile esitokisini
UFUNA izimpendulo umndeni webhungu laseFaireleigh, eNewcastle, elitholakale selishonile ekuseni ngoLwesihlanu ngemuva kokuvalelwa esitokisini samaphoyisa aseNewcastle.
Umndeni woMnuz Rodwin Martins (20) uthe awugculisekile ngemininingwano oyithola emaphoyiseni ethi wazibulala ngokuzilengisa ngosuku okwakumele avele ngalo enkantolo.
UMartins waboshwa ngoLwesithathu esolwa ngokuphatha isidakamizwa iwunga.
Unina kaMartins, uNkk Lotter Martins, obezwakala ukuthi lusamudla ngaphakathi lolu daba, uthe ngesikhathi beya emakhazeni ngemuva kokwaziswa ukuthi uzibulele bathola isidumbu sakhe sinomazisi nokhiye emaphaketheni ezimpahla ayezigqokile.
“Ngokwazi kwethu kazisali kumuntu oboshiwe lezi zinto uma engena esitokisini, zisala emaphoyiseni. Nebhande okuthiwa wazilengisa ngalo kuyisixaka ukuthi langena kanjani esitokisini ngoba nalo alivumelekile ngaphakathi,” kusho uNkk Martins.
Uthe amaphoyisa abatshela ukuthi indodana yakhe yatholwa isishonile ngaphambi kwehora lesithupha ekuseni. Abantu ababili ayenabo esitokisini bathi abezwanga lutho ngoba babe lele, baze bavuswa amaphoyisa ekuseni.
“Abantu ababili ayenabo egumbini elincane bathi abazwanga lutho ngoba babelele kwaze kwabe bavuswa amaphoyisa ekuseni. Kunzima ukukholwa lokho ngoba ngeke ulale nomuntu ungezwa lutho ubusuku bonke ngendlela elincane ngayo igumbi abebekulo. Ngokwazi kwethu amaphoyisa iziboshwa azibheka ngawo wonke amahora, kungani baze bathola ekuseni ukuthi useshonile?” kusho uNkk Martins.
Uthe bazolindela umbiko wokuhlolwa kwesidumbu olindeleke ukuthi uphume namhlanje.
Okhulumela amaphoyisa KwaZuluNatal, uCaptain Nqobile Gwala, ukuqinisekisile lokhu wathi amaphoyisa avule idokodo ngokubulawa kwendoda (20). “Amaphoyisa aseNewcastle ayaphenya ngemuva kokutholwa kwendoda izilengisile esitokisini.”