Ziphindela emgwaqweni izifundiswa ezingaqashiwe
ZIHLELE ukuthi zibe nokhukhulela-ngoqo wemashi izifundiswa ezingayitholi umsebenzi, ezikhala ngokuthi izikhalazo zazo azinakiwe.
Izifundiswa ezivela ezifundazweni ezahlukene ezilethwe ukufunda kulesi sifundazwe, sezihlele ukuthi ziphinde zingene emgwaqweni ngoLwesihlanu ngoba zikhala ngokuthi izikhalazo zazo azinakiwe.
Lokhu kulandela imashi yedlanzana lazo ebiyenziwe ngoJulayi 3 nonyaka lapho eziyise izikhalazo zazo ngokungaqashwa emuva kokufunda kuMasipala weTheku.
UMnuz Nkululeko Ndlovu (27), ongomunye wabahleli bale mashi, uthe abagculisekile ngezimpendulo asebezitholile kuMasipala weTheku emuva kokuthi behambise uhla lwezikhalazo zabo ekuqaleni kwale nyanga. Uthe babenike lo masipala amasonto amabili wokuthi uhambise uhlu lwezikhalazo zabo kuminyango kahulumeni nakosomabhizinisi abazimele.
“Sithe uma silandelela sathola ukuthi umasipala uthi awukaluliyisi ndawo uhlu lwezikhalazo zethu, okusho ukuthi lusaduve kuwona. Lokhu kuyasikhathaza ngoba kusho ukuthi azinakiwe izindaba ezithinta thina siyintsha engawutholi umsebenzi yize sineziqu. Asinakiwe noma sesiphumele emgwaqweni sazwakalisa izikhalazo zethu,” kusho uNdlovu.
Uthe sebebone ukuthi baphinde bagcwale umgwaqo. Ngokusho kwakhe, kulindeleke ukuthi isibalo sithi ukwanda ngoLwesihlanu ngoba ngesikhathi benemashi ekuqaleni kwenyanga abanye babo babesemakhaya njengoba bekuyisikhathi samaholide.
UNdlovu, oneziqu ze-Accounting azithole esikhungweni semfundo ephakeme i-Mangosuthu University of Technology (MUT), usehlale iminyaka emine engaqashiwe emuva kokuphothula izifundo zakhe.
Uthe ngaphambi kokuthi afunde waqale wafuna amatoho ngoba enzela ukuthola imali eyenele yokungena enyuvesi. Uthe baningi abanye abafana naye, abasebenze kanzima ukuze bafunde, okukhona kubo abasafunda manje nabangagcina bezithola besenkingeni efanayo yokungawutholi umsebenzi.
Ngesikhathi beyothula izikhalazo kuMasipala weTheku, umeluleki weMeya, uMnuz Mlungisi Ntombela wathi abafundi benze okufanele ngokuletha izikhalazo zabo ngoba njengomkhandlu bayakwazi ukuzinyusela emazingeni afanele.