Ithemba lokwehla kwesibalo sababulawa yiMDR neXDR TB
KUNETHEMBA lokuthi ikhambi lokwelapha isifo sofuba esingezweli emakhambini iMDR neXDR TB, iBedaquiline, eliqale ukusetshenziswa kule nyanga lizokwehlisa isibalo seziguli ezibulawa yilesi sifo ngenxa yezinkinga ezidalwa yimithi ebisetshenziswa phambilini.
Lokhu kushiwo uDr Anja Reuter wophiko lwezifo ezingezweli (Drug Resistant), kwiDoctors Without Boarders (MSF), eKhayelisha, eKapa.
UDkt Reuter uthe yize kunezihibe mayelana nokukhishwa kwekhambi iBedaquiline, uMnyango wezeMpilo bawushayela ihlombe ngokuthatha lesi sinyathelo.
UMnyango wezeMpilo uqale ekuqaleni kwenyanga ukukhipha ikhambi elisetshenziswa isikhathi esincane kunebesijwayelekile futhi elingasadingi ukuphelezelwa wumjovo.
Uthe uhlelo lwaphambilini lokwelapha isifo sofuba beluhlanganisa amakhambi amaningi wonke enobuthi bawo obebunemixhantelamuphumela. Ngaphezu kwalokho belunomjovo obuhlungu.
“Iziguli eziningi beziba nezinkinga zezinso nezinkinga zokuthi zingabe zisezwa ezindlebeni. Eziningi bezishona ngesikhathi seziqale ukusebenzisa amakhambi ngenxa yezifo eziningi ezidalwa ubuthi bawo amadala. Sifisa ukuthi amanye amazwe ase-Afrika nawo abonele eNingizimu Afrika esihambisana nemigomo ebekwe yinhlangano yezempilo emhlabeni, iWorld Health Organisation,” kusho uDkt Reuter.
Uqhube wathi zilinganiselwa ku-500 000 iziguli ezihlaselwa yiMDR-TB emhlabeni ngonyaka kodwa ziyingcosana ezithola ithuba lokuthi zilashwe ngamakhambi asezingeni eliphezulu efana neBedaquiline.
UDkt Norbet Njeka woMnyango weMpilo uthe iBedaquiline isetshenziswe ezigulini ezingalaphekanga kade kusetshenziswa amakhambi abesetshenziselwa ukwelapha iMDR-TB kusukela ngo-2013. Lena bekuyindlela yokubheka ukuthi isebenza kangakanani, obekwaziwa ngokuthi yiBedaquiline Clinical Access Programme (BCAP).
Imiphumela emihle yalolu hlelo uthe yiyo eyenze ukuthi umnyango uthathe isinqumo sokuthi kusetshenziswe iBedaquiline.
UDkt Yogan Pillay womnyango wezempilo kuzwelonke, uthe ngenxa yenkinga esekhona njengamanje yokuthi iBedaquiline ibiza kakhulu, bahlela ukuxoxa nezinkampani eziyikhiqizayo ukuthi zehlise imali eziyidayisa ngayo.