Siyadingeka isisombululo koluthinta iRBM
I-RICHARDS Bay Minerals (RBM) isezinkampanini ezimqoka emnothweni waKwaZulu-Natal njengoba ikweziqashe abantu abaningi.
Ngale kokwakha amathuba emisebenzi, le nkampani ekhiqiza ezokumbiwa phansi ikhokha nenkulu intela emnothweni wesifundazwe. Emnothweni waseKZN, u-50% womsebenzi wasezimayini wenziwa yiRBM kanti lokhu kusho ukuthi ifaka u-3.3% emnothweni ofakwa yizimayini ezweni lonke.
Lezi zibalo zikhombisa ukuthi le nkampani imqoka kangakanani nokuthi kungani kungamele kuvunyelwe izidubedube ezibheduke kulezi zinsuku ziphazamise ukusebenza kwayo ngoba lokho kubeka engcupheni inqwaba yemisebenzi.
Kunesiteleka osekunesikhathi siqhubeka kule nkampani esesiholele ekubulaweni komunye wonogada, uMnuz Vusi Mhlenyane.
Ngokwemibiko kuthiwa ngesonto eledlule kunabasebenzi abahlangana endaweni thizeni eduze kwaseRBM abahlasela izimoto zenkampani, bavimba umgwaqo, bahlasela abasebenzi nabanye abantu abasebenzisa umgwaqo oya kule nkampani.
Kuthiwa abasebenzi abaqashwe yinkampani esebenzisana neRBM, i-Unitrans/Ubunye, basesitelekeni esingekho emthethweni kanti bafuna ukunyuselwa amaholo.
Lolu daba seluze lwasukunyelwa nguNdunankulu, uMnuz Willies Mchunu, njengoba impelasonto yonke ebenemihlangano ezama ukuxazulula inkinga.
UMchunu usukuma nje yingoba uyakuqonda ukuthi inkampani imqoka kanjani emnothweni wesifundazwe ngoba yizizukulwane ngezizukulwane esezixosha ikati eziko ngenxa yale nkampani eyasungulwa ngo-1976.
Abaqhamuke nabezinyunyana nabaholi bemiphakathi eyakhelene neRBM abahlomula kakhulu ngale nkampani balekelele uhulumeni kutholakale isisombululo ukuze kuphinde kusetshenzwe ngokukhululeka futhi kungaphumi omunye umphefumulo.
Imisebenzi vele iyingcosana eNingizimu Afrika njengoba kuno-27% wabantu okufanele ngabe uyasebenza kodwa uswele imisebenzi. Akumele okwenzeka kwaRBM kuvunyelwe ukuthi kubhebhetheke.
Sithi dudu emndenini kaMhlenyane.