Ukutshala imali kungaba nomphumela omuhle nomubi
SIKHULA NGOMNOTHO
UKUTSHALA imali nokubeka imali yizinto ezimbili ezingafani. Uma ubeka imali usuke ulungiselela ikusasa ngoba kukhona ofuna ukukuthenga noma ulungiselela ukubhekana nesimo esingase sivele sidinge imali.
Ukulondoloza imali kuncike ekutheni kube nesiqiniseko sokuyithola uma usuyidinga futhi itholakale ngokushesha. Okusemqoka wukuthi imali iphephile hhayi ukuthi iyakhula. Umqondo ovamile wukuthi silokhu sibeka kancane kancane size sigcine sifikelele esambeni esisifunayo.
Inkinga ngokulondoloza imali wukuthi ayikhuli kodwa kufanele ulokhu ufakile. Okuhle wukuthi akuyibeki engcupheni imali yakho.
Ngakolunye uhlangothi ukutshala imali kuhloswe ngako ukuthi ikhule. Imali ikhula ngezindlela ezimbili. Okokuqala yinzalo etholakala uma ubolekisa ngayo. Eyesibili wukuthenga ngentengo ephansi bese udayisa ngentengo ephezulu.
Zombili izindlela zinamathuba amahle okukhulisa imali kodwa futhi zinezikhinsi. Uma uboleka abantu imali kufanele ukulindele ukuthi abanye ngeke bakhokhe.
Kusemqoka ukuthi ubabhekisise abantu obabolekayo ukuthi bazokwazi yini ukukhokha nokuthi banawo yini umlando wokubuyisa imali abayibolekile.
Okwesibili wukuthi ukuhlelele ukuthi bakhona abantu abangeke bakhokhe. Amabhange nezinye izinkampani ezibolekisa ngemali ziyakuhlelela ukuthi kukhona abangeke bakhokhe. Ingxenye yenzalo oyikhokhayo uma uboleke imali isuke ikhokhela nalabo abangakhokhi. Ukuhluleka ukubhekisisa abantu ababoleka imali kungasho ukulahleka kwayo. Noma uthenga bese udayisa kufanele ube nesiqiniseko sokuthi uzodayisa ngentengo ephezulu kunaleyo othenge ngayo.
Ake sithi udayisa izithelo emakethe, kungenzeka zingahambi ngokushesha ugcine usuphoqeleka ukuthi udayise ngemali engaphansi kothenge ngayo.
Lokhu kufana ncamashi nokutshala imali ngokuthenga amasheya kwiJSE. Ukuthenga amasheya kuzihlanganisa zombili izindlela zokukhulisa imali.
Kolunye uhlangothi uboleka ibhizinisi imali ukuthi likwazi ukukhula bese likukhokhela inzalo ebizwa ngama-dividends njalo ngonyaka.
Uyakwazi futhi ukwenza inzuzo uma intengo yamasheya ikhula bese uthengisa ngenani eliphezulu. Asikho-ke isiqiniseko sokuthi inkampani izokhula ikhokhe ama-dividends noma ukuthi intengo yamasheya owathengile izokhula. Ukungenzi kahle kwenkampani kungasho ukulahleka kwemali. Iqiniso wukuthi ukutshala imali kukubeka ethubeni elihle ukuthi ikhule kodwa akunaso isiqiniseko. Yingakho abeluleki bokutshala imali begcizelela ukuthi kufanele utshale imali ongaphila ngaphandle kwayo.
Iqiniso wukuthi ukutshala imali kungaba nemiphumela emibili, ukukhula kwemali noma ukulahleka kwayo. Ongoti ekutshalweni kwemali bazi kahle ukuthi uma wenza inzuzo kusuke kukhona olahlekelwe yimali.
Ngolimi lwakhona bathi emakethe yezimali kuhlezi kukhona izithutha. Akulona iqiniso elimnandi leli kodwa alikho elinye. Pho kungani abantu bekhuthazwa ukuthi batshale imali? Yikuphi okungcono ukubeka noma ukutshala imali? Kokubili kubalulekile, kufanele ube nayo imali oyibekile ongayithola noma nini uma uyidinga. Futhi uyadinga ukuba nemali oyitshalile eyenza inzalo ebonakalayo. Ukuthi ingakanani imali oyibekayo noma oyitshalayo kuncike esimeni sakho nokuthi yini ofisa ukuyizuza, lokhu abakubiza nge-risk appetite.
Okubalulekile wukuthi usheshe uqale ukuze kube nesikhathi esanele ukuthi imali ikhule. Imali oyitshalile ikhula kancane ekuqaleni kodwa ngokuhamba kwesikhathi ikunika inzalo ebonakalayo njengoba inzalo isuke nayo yenza enye inzalo.
Nakhona la ekutshaleni izikhinsi (risk) azifani. Zikhona izinhlelo ezinembuyiselo enkulu kodwa nezikhinsi zakhona zidephile. Lezi ezinezikhinsi ezingashoni kakhulu zinenzuzo encane. Izinkunzi eseziluvava ekutshaleni imali ziyayibhalansisa indlela ezitshala ngayo imali.
Imvamisa imali enkulu ziyifaka lapho kunengozi encane khona bese kuthi ingxenye eyodwa kwezine noma ngaphansi zijahe ngayo inzuzo ephezulu.
Izimfundamakhwela zibheka kakhulu imbuyiselo enkulu zifake yonke imali ezinhlelweni ezinengozi enkulu. Ngeke sakubiza ngokutshala imali lokhu kepha ukugembula lapho ubhejela into ongayazi. Yingakho kuwumqondo ophusile ukusebenzisa izinkampani zokutshala imali ezinomlando omuhle ngoba zona ziyakwazi ukwenza inzuzo engcono lapho ingozi incane khona.
Ekugcineni kusezandleni zakho ukuthi ufuna ukuhlomula kangakanani. Akusizi ngalutho ukuba nengebhe usabe ukutshala imali kodwa futhi akunamqondo futhi ukulahla imali ngokugembula ufuna imali esheshayo.
Sishayele ku 031 829 5820 noma uthumele uWhatsApp/ sms ku-083 354 8794. Thola ulwazi oluphangalele ku www.ubuntuwealth.co.za.