Kujabulisa izitha okwenzeka ebholeni
MHLELI: Akwaziwa mbantshi kujiya nokuthi iyiphi eyovuma ukugoba uphondo phakathi kweAjax Cape Town nePremier Soccer League ngodaba oluyimpicabadala phakathi kwabo. Mina sengithanda ukulahlekelwa yithemba nokuyihlonipha le nhlangano eholwa uDkt Irvin Khoza.
Engikubonayo ngePSL wukungafuni ukubuyela nganeno ivume ubudedengu bayo ukuze kuqhutshekwe nezinhlelo zokuqala kwesizini okumele iqale maduze. Ukudlulisa isinqumo sesincomo sikamehluleli uDenise Fischer kuyizinkomba zempakamo kobaba uKhoza nethimba lakhe. Kucacela nengane esakhasa ukuthi akukho okufundwe yiPSL ngendaba yokudlalisa imidlalo yokuhlungela ukungena kwiPSL nokuvikela izembe phezu kokuba kunecala ebelisenkantolo, nokuholele ekutheni ichithwe ithathwe njengento engekho imiphumela eyawelisa i-Leopards emadlelweni aluhlaza. Ezakamuva zibika ukuthi iPSL izosidlulisa isinqumo sikaFischer kodwa ithe imidlalo yokuqala kwesizini entsha izoqhubeka njengoba bekuhleliwe. Lokho kungenza ngibone ucadolo nolwembu lusingethe izikhulu eziphezulu ezithatha izinqumo ezingafundi emaphutheni eziwenzile.
Lokhu kusho ukuphelelwa wukuzigqaja nobuhlakani okwenza sibe izwe elingeke lisanikezwa igunya lokusingatha imiqhudelwano ethathwa njengemikhulu okubalwa i-Afcon kanjalo nayo iFIFA World Cup.
Ubani osengabheka ukuthi iqembu lesizwe lizokwenza kahle emva kwale nzukazikeyi? Kungani sizenze inhlekisa emazweni angafuni ukusibona siphumelela ikakhulukazi ngemuva kokusingatha iNdebe yoMhlaba? Kujabulisa izitha zethu esikwenzayo.
Ave sekudingeka ukuthi kuphathe abantu abasha abanemiqondo emisha kwiPSL? Kungani iNingizimu Afrika isilele ngemuva ekufakeni intsha ezintweni ezingumgogodla wezwe? Nakwezombusazwe kusagcwele abadala. Uma kuzothiwa uKhoza wenzele izwe into yamehlo akekho oyothatha indawo yakhe, kusho ukuthi ngeke siye ndawo. Kumele kuliwe nesihlava sokudla ngoludala. Mxolisi Zuma PIETERMARITZBURG