Ungihlukumezile unesi obezibiza nge-starring
Mduduzi Mrango Magutshwa MHLELI: Ngizwakalisa ubuhlungu engibuzwa ngaphakathi ngendlela abahlengikazi abasihlukumeza ngayo ezibhedlela.
NgoMeyi 23 ngatetela esibhedlela e-Utrecht ngomthungo ngadluliselwa kwesinye ngenhloso yokuyolapha umntwana emuva kokubelethwa owayekhukhumala isisu. Igama lesibhedlela yiProvincial eNewcastle.
Ngalala izinsuku ezimbili kwakuhle kwangena i-staff esinye ebusuku uSister wafika wangibuza iminyaka ngamtshela, wathi ngiwugogo akangifuni ewodini lakhe ufuna izingane ezizozwa yena. Wagxeka inkolo yami yakwaShembe ethi yinkonzo yemali kulwa abaphathi babanga imali. Uma engibiza wayesethi Shembe nobuNazaretha uma ngingavumi ethi ngiwugogo oluhlaza uzongi-solva.
Ngangincelisela endaweni ekude ethi ngeke angisondeze ewodini lakhe esondelene nomntwana khona ngizogcina ukuzala. Wakhuphula umbhede ukuthi ngingakwazi ukugibela ngabika wathi akanalusizo. Ngahlala esitulweni kwaze kwasa. Wathi thina maNazaretha sithanda ucansi.
Le nto yenzeka izinsuku ezintathu iBP yami iphezulu ixake odokotela ngesaba ukubatshela. Ngacela ukubizelwa abaphathi ngasizwa wuMatron Ndlovu wangisusa ngaya kwenye i-ward emva kokuzwa udaba.
Okwangicika wukuthi ngangithi mangikhala ngokuthi uyangihlukumeza avele acule athi noma ngingenzani nguye i-starring. Ngicela uNgqongqoshe wezeMpilo (uDkt Sibongiseni) Dhlomo angenelele. Mama uNgubane