Lihlehlisiwe elokubulala lenkosi yaseBergville
LIHLEHLELE u-Agasti 1 kulo nyaka icala lenkosi yakwaHlongwane eNgobamakhosi, eBergville, ebhekene namacala ayisihlanu okubulala ngokungenhloso amalungu omndeni owodwa engozini yomgwaqo enyantisa igazi eyenzeke ngonyaka odlule usuphela.
Inkosi uMenzi Hlongwane ivele ngokokuqala eNkantolo yeMantshi yaseMtshezi izolo izozwa ngamalungiselelo okulalelwa kodaba lwayo.
Ifike idlubhe isudi emnyama nothayi ihamba nesiqhoqho samadoda abeyisingethe, ebonakala ukuthi azoyiqinisa idolo.
INkosi yaMaNgwane iqale yathatha umzukuzuku ukungena enkantolo njengoba ibe ngowokuqala ukubizwa kubasolwa abebezovela phambi kweMantshi.
Ubelokhu ebuze njalo umabhalane ukuthi ukhona yini uHlongwane, abebehamba naye bephendule ngokuthi usesendlini encane uyeza.
Kuze kwaphoqa ukuba kwedlulelwe komunye umsolwa nokho obuye wehliswa ebhokisini sekungena inkosi.
Imantshi iqale yathi ukungqumuza nomshushisi bebonisana ngemicilikisho ethize okusafanele iqedelwe ngaphambi kokuqala kwecala.
Kuleyo nkulumo kuvele nokuthi kukhona ubufakazi bochwepheshe okusafanele bulethwe enkantolo njengemiphumela yokuhlolwa kwezidumbu zalabo abashona engozini.
Imantshi iveze nokuthi kusafanele kuqedelwe okuthile bese amakhophi emininingwane yedokodo edluliselwa kummeli wommangalelwa awacubungule kahle ukuze bazilungiselele.
Isolezwe ngeSonto like labika ngaleli cala lenkosi yaMaNgwane nalapho okuvele khona ukuthi inkosi yayihamba ngesivinini esiphezulu ohlangothini lwezimoto ephambana nazo ngesikhathi itholana phezulu nenye imoto. Kuthiwa yayihamba ngonyanyavu lwemoto iLand Rover ihamba nabanye abathize emotweni abasinda bona.
Ngesikhathi ifika enkantolo izolo ibihamba ngayo iLand Rover emnyama ebhalwe igama elithize esikhundleni sezinombolo. Akucaci noma yiyo yini imoto eyaba sengozini eholele kuleli cala.
Ngesikhathi iphuma enkantolo iphuthume yangena emotweni yahlala khona umlibe ngesikhathi amadoda emi isixongololo eduze kwale moto.
Okuqaphelekile wukuthi ezokuphepha ziqinile enkosini njengoba bekukhona abesilisa abebengasuki eduze kwayo.
Kuphinde kwavela nokuthi nayo iNkosi yaMaNgwane yasinda isesimeni esibi njengoba yaphuthunyiswa esibhedlela kuvalwe amehlo kodwa yagcina iwuphonsa umbalane njengoba isingumqemane.
Leli phephandaba liphinde lahabula ngemithombo esondelene nodaba ukuthi iNkosi yaMaNgwane ngaphambi kwesiphihli sengozi yayikade imiswe amaphoyisa aze ayibhala ithikithi lesivinini.