UKhune ukhala ngoKomphela
UKUCULA iculo elehlukile kukakaputeni weKaizer Chiefs,u-Itumeleng Khune, ngobengumqeqeshi waMakhosi, uSteve Komphela, kukhombisa ngokusobala ukuthi abantu bebhola balala bephenduka.
UKhune,Siphiwe Tshabalala noWillard Katsande bebehlale bethi bayameseka uKomphela futhi bayakuqonda akufunayo kubona. Laba badlali abadala beChiefs bebethi bakhuthaza labo abasebancane eqenjini ukuthi badlalele uKomphela ukuze angalahlekelwa umsebenzi. Bebebuye bathi kumele kugxekwe bona bengabadlali, hhayi uKomphela ngoba akangeni ensimini adlale.
Ngempelasonto,uKhune ubhoboke ngokuthi iqembu lidonse kanzima ngaphansi kobuholi bukaKomphela ngoba abanye abadlali bebengayiqondi indlela abefuna kudlalwe ngayo.
UKomphela ushiye eNaturena engawinanga neyokubika indebe emuva kwamasizini amathathu nokuyinto engakaze yenzeke kuleli qembu. Ukungawini lutho kweChiefs kunyuse ulaka kubalandeli olugqame kakhulu ngasekupheleni kwesizini ka-2017/2018 nokuyilona oluholele ekutheni uKomphela asule njengomqeqeshi.
Ngeledlule, Amakhosi amemezele owayengumqeqeshi weFree State Stars,uGiovanni Solinas, ngozoshayela umkhumbi waseNaturena ngesizini ka-2018/2019. Lo mqeqeshi ubuke abadlali ensimini okokuqala emqhudelwaneni iBokone Bophirima Maize Cup eNorth West. IChiefs igcine idle umhlanganiso. “USolinas wethuliwe kithina, wasitshela indlela afuna sidlale ngayo uma siphethe ibhola noma singaliphethe. Awukho umehluko kunabanye abaqeqeshi asebeke baqeqesha lapha kwiChiefs. Kodwa wonke umqeqeshi unendlela yakhe. Sizoyihlonipha futhi sizoyibamba njengoba injalo. Sizokwenza lokhu akushoyo singabadlali. Esikufunayo yimiphumela nokushintsha isimo. Sesibe nengcindezi amasizini amathathu edlule, sonke siyakwazi lokho,” kusho uKhune. “Ngeke nginekele izwe indlela afuna sidlale ngayo noma sengiyazi, iyisikhali sethu.Kudingeka sithole imiphumela, sidlale ibhola elithokozisayo. Kufanele siphindele ekuwineni izindebe, lelo yisiko lethu. Singabadlali sizitshelile ukuthi asifuni ukukhunjulwa njengesizukulwane esiwine izindebe, saphinda saphula amarekhodi okungawini izindebe. “Sikuzwile ukuwina ngaphansi kukaStuart Baxter, wahamba. Emuva kwalokho sidonse kanzima ngaphansi kukaSteve ngoba iningi lethu belingakwazi ukuyibamba into ayifunayo kithina singabadlali. Kodwa ngiyethemba ukuthi ngaphansi kukaSolinas izinto zizojika.” IChiefs isayinise abadlali abasha okukhona kubona uLetlhogonolo Mirwa noKhama Billiat obegijima kwiMamelodi Sundowns. Ukudonsa isikhathi eside iChiefs ingamemezeli umqeqeshi kade kunenga abalandeli,bebuza ukuthi kuzokwenzekani uma efika ethi abekho ezinhlelweni zakhe. Amaqhinga kaSolinas azovivinywa okokuqala uma iChiefs isibhekene neSundowns kwiShell Helix Ultra Cup eFNB Stadium, eNasrec, ngoMgqibelo ngo-3 ntambama. “Kuleli sonto sizosebenza nomqeqeshi okokuqala. Kuzofika uLwesihlanu sesilungiselela umdlalo weSundowns, sizobe sesazi ukuthi udingani kithina singabadlali. Sonke sesidlale iminyaka futhi saqeqeshwa abaqeqeshi abehlukene,” kusho uKhune. Mayelana nokusayina kukaBilliat uthe, “Ngijabule kukhulu.Uyambona uma ebamba ibhola,ungumdlali osezingeni eliphezulu. Uyazithola izintuba futhi uyawasebenzisa amathuba. Ubesithwalisa kanzima esadlala kwiSundowns. Ngethemba ukuthi uzokuletha lokho eqenjini. Thina sizomnika ibhola ukuze ezojezisa amanye amaqembu.”