Iphoxile iDowns igotshwa yi-AS Togo
IPHOXILE iMamelodi Sundowns iqeda usuku kuyiyona ebambe ibhuleki kwi-log ka-GroupC weCAF Champions League kulandela ukunikela kwayo ngamaphuzu kwi-AS Togo-Port ebiqala ngqa ukuwina (kulo mqhudelwano), izolo ntambama eStade General Eyadema, eLome, eTogo.
Bekungalindelekile nokho ukuthi iSundowns kungaba iyona engadlala kahle kulo mdlalo ngoba yona kade ihleli ibuka iNdebe yoMhlaba ekubeni iTogo-Port ibiqhubeka neyeligi.
Kulo mdlalo kuqale u-Andile Jali obebonakala okokuqala kwiSundowns kusukela esayine kuyona esuka kwiKV Oostende yaseBelgium.
Kusheshe kwacaca nokho ukuthi ijubane likaPercy Tau, obekulindeleke ukuthi alibhekise e-England izolo, noKhama Billiat osayine kuKaizer Chiefs, liyadingeka ngoba iSundowns iqale ngoSibusiso Vilakazi ongekho kangako “emahhashini”.
Bekuze kube uThapelo Morena obedala inkinga odongeni lweTogoPort.
Esiwombeni sokuqala bekubukeka sengathi iSundowns iwuphethe umdlalo kodwa bekuyiqembu lasekhaya ebeliyingozi uma liya ngasemapalini kaDenis Onyango. Ngomzuzu ka-40,uRicardo Nascimento ubethi uzama ukwenza i-offside kodwa ibhola lashaya kuyena lawela ku-Abel Kissibo Hunlede olidumise enethini.
Lokhubekukhomba inkinga kwiSundowns ngoba iye kulo mdlalo isaphumelele ukuqoqa amaphuzu amabili kuphela emidlalweni yayo yokuqala yamaqoqo. Ompetha base-Afrika bango-2016 bebengadlalisi okweqembu elibuya okwesithathu kulandelana kweyamaqoqo yeChampions League.
Zize zaya ekhefini iSundowns ingakhombisi ukuthi iyabona ukuthi isenkingeni uma umdlalo uqhubeka ngendlela obuqhubeka ngayo.
Ithuba eliwele kuThokozani Sekotlong ongene ngesikhathi sekhefu endaweni kaHlompho Kekana,bekufanele alisebenzise kwazise iqembu lakhe belilandela ngemuva. Zithe ziya emizuzwini ka-70, iSundowns ibisiqala ukukhombisa izimpawu zokukhathala kodwa ithuba elitholwe uVilakazi ngomzuzu ka-73 bekufanele lingene.
Kufikwa kule mizuzu kusewu 1-0 nje yingoba,uJean-Robert Klomegan obevimbele iqembu lasekhaya, ubevukile emaqandeni. Lo nozinti uqale umdlalo usuka phansi evimba amabhola obekubukeka kulula ukuwavalela enethini kunokuwashweba. Phakathi kwabadlali abagejile kukhona uJali, Oupa Manyisa, Themba Zwane noVilakazi amahlandla amaningi.
*Umbiko ulotshwe sekusele ihora uqale omunye umdlalo ka-Group C phakathi kweHoroya neWydad Casablanca izolo eConakry.