BAYAFA IMBAZO YOMASTENDE ABADLALI BE-SUNDOWNS ABALINDE UPITSO
KUGUGA iphakethe kubadlali abasemabhukwini eMamelodi Sundowns ababuyele eqenjini labo kade bebolekisiwe ngesizini edlule.
Okubanga lokhuukuthi iningi labo okukhona kubona uThela Ngobeni,Sibusiso Kumalo, Bongi Ntuli, Mokgakolodi Ngele noCuthbert Malajila, abazi noma baqashe izindawo zokuhlala ePitoli noma balinde yini.
Baziqeqesha nezikimu ezincane ngesethembiso sokuthi bazocacelwa konke ngokuzokwenzeka ngabo uma uPitso Mosimane umqeqeshi weSundowns, esebuyile eTogo lapho ebeyodlala khona umdlalo weCaf Champions League.
“Ukubawumdlali weSundowns kwenza uzikhethe izindawo ongahlala kuzona. Lapho sijwayele khona ukuthola izindawo kumba eqolo ngoba kuyaziwa ukuthi sidlalela iSundowns ngakho-ke imali ithi tata kithina. Njengamanje asikwazi ukuqasha izindawo ngobakufakwa imali enkulu yokubambisa okungaba yinkinga uma umqeqeshi esebuya ekukhomba eFree State kumbe KwaZulu Natal. Siphila ngokukhokhela usuku ngalunye okuyinto esibulalayo ephaketheni ngoba kwezinye izindawo kukhokhwa u-R500 ngosuku,” usho kanje omunye walaba badlali okhulume noPotshoza ngesivumelwano sokuthi igama lakhe ngeke livele.
Iqhawe lakho selingakuveza nokuthi laba badlali bafunwa ngapha nangapha kodwa iSundowns ayifuni ukudayisa kepha ikholelwa ekubolekiseni.
“Inkinga ngalokhu kubolekiswa ukuthi iSundowns ithi iqembu eliboleka umdlali kuyona kumele likhokhele lowo mdlali ngokugcwele kanti manje ukukhokha kwamaqembu akufani,” ujobelele kanje lo mdlali ebika usizi lwakhe kuPotshoza. Augousti bephika belala ngomhlane eyokuthi basezingxoxweni esezihambe ibanga elide ngokusiza kumbe ukutakula uMax Tshabalala abamdayisela iBloemfontein Celtic ngo-2014 kodwa iqhawe lakho uPotshoza likuhoshile ukuthi lokhu kuyiqiniso.
Yize iqhawe lakho lingenayo yonke imininingwane kodwa iziteleka zakamuva ngenxa yokuthi kunabadlali ababuye bangaholi, zingase ziholele ekutheni uTshabalala awudayisele futhi lo mndeni ngoba inhloso yabo ukugcina iqembu lingelaseBloemfontein.
Kuke kwavela kamuva ukuthi uTshabalala uzama ukudayisa kodwa yasheshe yachithwa indaba yokuthi i-Ajax Cape Town efuna ukuthenga. Leli qembu lisanda kuqasha uSteve Komphela njengenhloko yabaqeqeshi kulandela ukusula kungalindelekile kukaVeselin Jelusic waseSerbia.
UPotshoza usengakusho ukuthi abadlali sebebuyele emsebenzini kodwa akucaci ukuthi babuye ngaliphi. Kungenzeka ukuthi u-Ikie noJimmy (olungangatshazwa uthando lwabo lweCeltic) sebekhulumile nabadlali babachazela ngokuzokwenzeka.
Uma bethintwa laba abakwaAugousti ngalolu daba bavele babande bakhulumele phansi bese bekuchaza njengenzwabethi ukuthi bafuna ukuthenga iCeltic. UPotshoza uthule ubhekile.