Uyifisela umqeqeshi osemncane iBafana
ISIKHALO sokunganikwa ithuba kwabaqeqeshi abasebancane emaqenjini esizwe eNingizimu Afrika sikulezo zinkulumo ezihleze zihlukanisa abathandi bebhola phakathi.
Babodwa abakholwa wukuthi ukungaqini kokhakhayi kwalaba baqeqeshi yikona okudala ukuthi bangaqashwa kanti bakhona nabathi kuhle baqashwe kusemanje ukuze bathole isipiliyoni sokumelana nengcindezi ezimeni ezehlukene.
Omunye wabaqeqeshi abasebancane ebholeni nguRulani Mokwena, oyiphini likaMilutin “Micho” Srodojevic kwi-Orlando Pirates. Ngokusho kukaMokwena kungabawumqondo omuhle ukuqasha umqeqeshi osemncane kwiBafana Bafana kodwa kubalulekile ukuthi kube ngumqeqeshi owenza umsebenzi oncomekayo futhi onerekhodi elizikhulumelayo, kungavele kuphahlekwe nje.
“Ngokwami ukubona kufanele abaqeqeshi abasebancane basebenze kanzima bazibonakalise ngaleyo ndlela sizobalula isinqumo sokuba baqashwe. Akufanele nakancane sinikwe umsebenzi ngoba nakhu sizwelwa noma ngoba nakhu kunengcindezi yokuthi sisebancane ekubeni singashayi into ecokeme. Ngokwami indaba yeminyaka nokukhula komqeqeshi ayisho lutho uma nabo abaqeqeshi bengasebenzi kanzima,” kusho uMokwena.
Phakathi kwabaqeqeshi abasebancane abashaya into ecokeme kuleli singabala yena uMokwena, obengomunye wongqondongqondo ebhentshini leMamelodi Sundowns ngesikhathi inqoba isicoco seCAF Champions League ngo-2016, Fadlu Davids ocija iMaritzburg United eqophe umlando iqeda endaweni yesine kwilogi ye-Absa Premiership yaphinde yafika kowamanqamu kwiNedbank Cup.
Kukhona noBenni McCarthy, ocija iCape Town City nayo engene kwiTop 8 noBernard Molekwa wePolokwane City ofike wayivusa iRise and Shine ngesizini edlule,ukubala abambalwa.
“Mhlawumbe ngelinye ilanga ngiyoyiqeqesha iBafana kwazi bani. Okwamanje kodwa nginenkontileka nePirates futhi ngisakujabulela ukusiza iqembu. Kuningi engifuna ukukuzuza neZimnyama,” kusho uMokwena.
Amazwe amaningi anedumela emhlabeni kunobhutshuzwayo acijwa abaqeqeshi basemazweni akhona. Lapha sibala iFrance ecijwa uDidier Deschamps wakuleliya lizwe. IFrance idle iNdebe yoMhlaba ngeSonto ngemuva kokuqumba phansi iCroatia ngo 4-2.
IBrazil ayikaze icijwe ngumqeqeshi wangaphandle njengoba isinqobe izicoco zeNdebe yoMhlaba kahlanu. ISenegal, ephume kabuhlungu kwiNdebe yoMhlaba ngenxa yamakhadi aphuzi ngemva kokubambana neJapan ngamaphuzu namagoli, icijwa ngu-Aliou Cisse obeyigijimela kwiNdebe yoMhlaba ngo-2002, eKorea naseJapan.