OkaNdunankulu kowamaqakelo
UFISA ukwehlisa umthwalo ezinganeni zamantombazane ezingawatholi amaqakelo unkosikazi kaNdunankulu waKwaZulu-Natal, oseqale umkhankaso wokunikela ngawo.
UNkk Zodwa Mchunu ongunkosikazi kaMnuz Willies Mchunu, uthe lo mkhankaso obizwa ngeMillion Comforts, akuwona owesifundazwe kuphela kodwa ufisa ukufinyelela kuzo zonke izindawo. Unxenxa bonke abakuleli ukuthi bawungenele lo mkhankso oxhaswe ngabakwaDischem ukuthengela izingane amaqaleko. Ngesonto eledlule uNkk Mchunu obephelezelwa wuNdunankulu, uNgqongqoshe woMnyango wezokuThuthukiswa koMphakathi KwaZuluNatal uNkk Weziwe Thusi noNgqongqoshe wokuBusa ngokuBambisana nobuHoli boMdabu, uNkk Nomusa DubeNcube, bagcwalise izinqola ezitolo ePavillion eThekwini bethenga amaqakelo.
UNkk Mchunu oyinxusa leMbumba Foundation, uthe lo mkhankaso uwenza ngaphansi kohlelo iCaring4Girls.
“Isifundazwe sethu asinayo imali eyanele, yingakho sicela wonke umuntu ukuthi anikele. Akumele kube nezingane ezihlala isonto lonke zingayi esikoleni ngenxa yokuthi azinawo amaqakelo. Sibonga undunankulu nabo bonke ongqongqoshe abasixhasile ngoba lo mkhankaso ubungeke ube yimpumelelo sisodwa. Sizowahambisa ezikoleni ezahlukene lapho kunezingane ezidinga amaqakelo,” kusho yena.
Ngenyanga edlule emcimbini weSolezwe obizwa ngeNtandokazi, uNkk Mchunu waveza ugqozi lokuthuthukisa umphakathi. Uthe uzoba nezinhlelo zokulekelela ngisho abesifazane abahlukumezekile ngaphansi kwehhovisi lakhe esifundazweni. Lokhu wakusho emuva kokuxoxa ngobuhlungu bodaba lokukhula kwakhe emuva kokushonelwa unina athi wabulawa nguyise.
UNksz Nana Xulu okhulumela iSpousal Office esifundazweni, uthe ngenyanga ezayo bazovakashela izikole ezimbili ukuyonikela ngamaqakelo, esinye sazo athe siseMsinga. Uthe lona umkhankaso ozoqhubeka ukuze kusizakale izingane zamantombazane.
Lo mkhankaso uzoqubheka nasezitolo zakwaDis-chem ezingu-100 lapho kuzobekwa imigqomo okufakwa kuyo amaqakelo. I-Independent Media, engabanikazi beSolezwe, iyingxenye yalo mkhankaso.