Ufuna ukufukula osomabhizinisi abancane oweDCCI
SIZIMISELE ngokuthuthukisa osomabhizinisi abancane isikhulu esisha seDurban Chamber of Commerce and Industry (DCCI), uNkk Palesa Phili.
Lezi zindaba uzidalule engxoxweni ekhethekile neSolezwe lapho eveze khona ukuthi uhlele ukuthuthukisa osomabhizinisi abancane, emalokishini, ezindaweni zasemakhaya, abadlala izitokofela nabanamabhizinisi ayimifelandawonye.
UNkk Phili owafunda eMoshoeshoe II High School eLesotho, uqale ukuba yisikhulu esiphezulu kwiDurban Chamber ngoJulayi 1 engena esikhundleni sikaNkk Dumile Cele.
UNkk Phili ubeyiNhloko yakwaMTN ebhekele ukusebenza kwale nkampani KwaZulu-Natal ngaphambi kokungena kwiDurban Chamber.
Uthe njengoba ucwaningo luveza ukuthi amabhizinisi amancane ayawa kungakapheli iminyaka emithathu esunguliwe ufuna ukuwaseka ukuze uphele lo mkhuba.
“Amabhizinisi amancane ayawa ngenxa yokuswela izinsiza, ngifuna ukuwaseka ngoba abalulekile ekudaleni kwamathuba omsebenzi. Sizoba nezinhlelo eziningi zokuwasiza kwiDurban Chamber, sizohlomisa osomabhizinisi ngolwazi oluzobasiza ukuthi bangene ezimakethe, bathuthukise izinkampani zabo ukuze zikhule ziqashe inqwaba yabantu. Ngizoyibhekelela intsha ngezinhlelo zayo futhi ngeke siwashiye ngaphandle amabhizinisi asemalokishini, emakhaya nalawo ayimifelandawonye,” kusho uNkk Phili.
Izinkampani ezinkulu ngeke azishiye ngaphandle njengoba ethe yizona ezinemali, ngakho uzoqhubeka nokuzinaka azicele ukuthi zisebenzisane nosomabhizinisi abancane ukuze kusimame umnotho.
“Sinohlelo oluxhaswe yizinkampani ezinkulu olubizwa nge-Enterprise Supplier Development (ESD) lapho kufundiswa osomabhizinisi abancane amakhono azobasiza ukuthi bakhule. Baqeqeshwa ngomakadebona kwezamabhizinisi okubalwa kubo uMnuz Kim Macilwaine, Nkk Zee Cele, Mnuz Karl Schimdt noMnuz AK Essack,” kusho uNkk Phili.
Ugqugquzele osomabhizinisi ukuthi babe ngamalungu eDurban Chamber kungakhathaleki ukuthi banezinkampani ezincane kangakanani ngoba iyisikhungo esinemininingwane eminingi esiza osomabhizinisi abadinga ukusizwa ngemali, ezobuchwepheshe nenye ingqalasizinda.
Umyalezo wakhe entsheni wukuthi ikholelwe kulokho ekwenzayo, isebenze ngokuzikhandla ithole nabantu ezofunda kubo ukuze iphumelele emikhakheni ekuyo.
UNkk Phili ubusiswe ngezingane ezimbili zabafana.
Uyilungu leSouth African Institute of Directors, uhlala emabhodini ahlukene ezamabhizinisi okubalwa kuwo neleSmartXchange ne-Invotech incubators.
Uneziqu zeMasters kwiBusiness Administration azithola eNyuvesi yaseJohannesburg (UJ) neDiploma yeBusiness Information Systems ayenze e-Oxford College of Education eseRosebank.