Umfundi ofuze abazali ngamakhono
USIKE iphethini kubazali bakhe umfundi ona-13 weminyaka yobudala ngokungena emkhakheni wezebhizinisi njengoba enza izinto zobuhlalu ngezandla futhi asebenzise izinto asezisebenzile noma ezilahliwe zibe zintsha.
UNgothando Khumalo (13) ofunda uGrade 7 esikoleni samabanga aphansi eDlambula uthe waqala ukuthanda umsebenzi wezandla eneminyaka eyisithupha.
“Umama wami wabona ukuthi nginekhono lokwenza umsebenzi wezandla futhi ngiyawuthada, wangitholela usisi owangisiza ngokulipheka ikhono lami,” kuchaza uNgothando.
Akagcini nje ngokwenza ubuhlalu uqoqa udoti, amabhodlela noplastiki ukuze enze nemihlobiso yasendlini.
Unina kaNgothando, uNkk Fika Khumalo uthe wabona esakhula ukuthi ingane yakhe inekhono lokusebenza ngezandla wayigqugquzela ngalo msebenzi.
“UNgothando wenza umsebenzi omuhle ngezandla zakhe. Akasiyo ingane evilaphayo yingakho ngibona sengathi ikhono lakhe liya phambili,” kuchaza uNkk Khumalo.
UNkk Khumalo naye owenza kakhulu umsebenzi wezandla njengoba engumenzi wewayini elakhiwa ngezithelo, okubalwa kuzo ube-troot, ithanga no-cucumber.
UNgothando uthe iphupho lakhe wukuthi umsebenzi wakhe ufinyelele emhlabeni wonke, abone abantu abaningi kuleli begqoke umsebenzi wakhe.
“Abangani bami nothisha bami esikoleni, bayaweseka umsebenzi, nabazali bami ngoba umsebenzi wami omningi bayawuthenga, uma kuwubuhlalu bayabugqoka.”
UNgothando uphethe ngokuthi ufuna ukuba wumpheki nokuthi akhuthaze ontanga yakhe ukuthi benze umsebenzi wezandla, bazakhele bona amathuba omsebenzi noma babe osomabhizinisi ngamathalente abo.