Ithuba lokuthuthukiselwa amabhizinisi kwabesimame
ABESIFAZANE abamnyama bazothola ithuba eliyingqayizivele lokuthuthukiselwa amabhizinisi abo okwakha.
Lokhu kuzokwenziwa yibhange Ithala ngaphansi kwe-Ithala Development Finance Corporation (IDFC).
UNkk Farhana AbdoolKader, oyisikhulu sezakhiwo esibambile eThala Development Corporation Ltd, uthe banezinhlelo zokuphucula izakhiwo KwaZuluNatal.
“Njengoba kuvuselelwa izakhiwo zethu enyakatho yaKwaZulu-Natal, sicuphe ngezinye izinhlelo zokuphucula izakhiwo. Sifisa ukusiza amabhizinisi awu-60 abantu abamnyama ukuthi athuthuke ukuze ezokwaziwa, agunyazwe ukuthi angene ohlwini lwethu. Sibheka amabhizinisi entsha awu-30, nawabesifazane awu-30,” kuchaza uNkk Addool-Kader.
Njengengqalabutho yentuthuko yamabhizinisi asemalokishini nasemakhaya, i-IDFC ithe iyabazi ubumqoka bokuthuthukisa ingqalasizinda, ukunciphisa ububha nokufukula umnotho.
UNkk Abdool-Kader uthe njengesikhungo sikahulumeni, bayasabela uma ehlaba ikhwelo (uhulumeni) lokuthuthukisa umnotho nokufukula abantu baKwaZulu-Natal.
“Ngonyaka odlule sisebenzise efinyelela kuR47.2 million ukuvuselela izakhiwo zethu ezindala KwaZulu-Natal. Le mali isize amabhizinisi abamnyama bendawo.”
Uqhube wathi le misebenzi, okubalwa kuyo owokufakwa kukagesi, amapayipi amanzi, ukulungisa uphahla, ukupenda nokubiya, yenziwe emabhizinisini awu-12, iningi lawo okungawabamnyama, okusho ukuthi kudaleke amathuba omsebenzi awu-301.
Uthe abafisa ukungenela lolu hlelo lokuthuthukiswa kwamabhizinisi abo kumele ukuthi babe abantu baKwaZulu-Natal, babe nesitifiketi seBEE noma esifungelwe esifakaza ukuthi yibhizinisi lomuntu omusha noma wesifazane omnyama.
Inkampani yakhe ineminyaka emithathu ikhona, ibhaliswe kwiCentral Supplier Database esehhovisi loMgcinimafa, futhi iqashe abantu okungenani abayisihlanu.
Uthe abafisa ukuba yingxenye yaleli thuba kufanele inkampani ibhaliswe e-Construction Industry Registration Board, ibe kuGrade 1 kuya kuGrade 3 emkhakheni wokufaka amanzi, izitamkoko namapayipi amanzi, ugesi, nesitifiketi sesinxephezelo uma kwenzeka ulimala emsebenzini.
Uthe abafisa ukuba yingxenye yalolu hlelo bangathumela i-email ku: supplierdevelopment@ithala. co.za noma bangene ku-www. myithalastory.com ukuze bathole ulwazi.