Ukhala ngamaphutha enziwe onondweba
UKHALE ngamaphutha onondweba echitha ingcindezi yokunqoba isicoco bengosokhaya be-2018 Under 21 SAB National Championships, umqeqeshi weKwaZulu-Natal, uSiyabonga “Qhawe” Ndlovu.
Lo mqhudelwano odlalelwa ezinkundleni ezingaphandle kweKing Zwelithini Stadium, eMlaza, uzosongwa ngeSonto.
“Ingcindezi (yokunqoba bengosokhaya) ayikho kangako. Into nje engisayiqaphelile amaphutha enziwa ngonondweba. Ngiyaqonda futhi iningi labo basebancane kakhulu nokuwumqondo omuhle kwiSafa ukubathuthukisa.
Inkinga-ke kodwa wukuthi thina singabaqeqeshi sifuna ukunqoba. Ngaleyo ndlela ayasilimaza amaphutha abo,” kusho uNdlovu.
NjengeRussia evule umqhudelwano ibasela inqwaba yamagoli emdlalweni wokuqala weNdebe yoMhlaba ka-2018, neKZN Under 21 ivule ngokuvuthela ngo 4-1 iNorthern Cape, eteketiswa “ngezenduku”.
UNdlovu ukhale kakhulu ngonondweba obephethe umdlalo wabo wesibili izolo lapho bebambane khona ngo 3-3 neGauteng evikela isicoco.
UBongisani Nkosi ushayele iKZN amagoli amabili kulo mdlalo.
“Umqhudelwano muhle kakhulu. Wonke amaqembu ayasigijimisa ngoba nabayizolo (ngoLwesibili), basinike umdlalo onzima kodwa sakwazi ukubehlula.
Emdlalweni wethu wesibili sipaquzile futhi umdlalo bese siwunqobile kodwa ngikhala ngesikhathi esengezwe ngunondweba nezinqumo zakhe ekhipha abadlali bethu ababili ngamakhadi abomvu. Ziyakhalisa. Kwelokuqala ikhadi utshelwe wumdlali wezitha ukuthi kwenzekeni wabe esekhipha ikhadi elibomvu. Ubengeze imizuzu emithathu kodwa igoli abalinganisile lingene sekuphele imizuzu emihlanu. Muhle umqhudelwano kodwa ngicabanga ukuthi ungaphezu kwamandla abo,” kusho uNdlovu, onezicucu ezinguLevel 2 zeFA Coaching Licence.
“Izicucu zami ngizenze e-UK. Ngenhlanhla yami engandele bani, abazali bami sebenesikhathi behlala khona ngakho kube lula ukuthola ithuba lokufunda khona. Ngisazimisele kakhulu ngokuqhubeka nokufunda. Imiqhudelwano efana nale izosiza kakhulu ekungiqiniseni ukhakhayi,” kusho uNdlovu.
Ephawula ngeyonondweba uKwenzakwakhe Ngwenya, uvumile ukuthi basebancane futhi inhloso yikho ukubathuthukisa.
“Sithathe abadlalisa kuyo iSAB. Njengoba nibabona nje besebancane. Bavela ezifundeni ezahlukene zeSafa,” kusho uNgwenya, ongusihlalo wekomiti leSafa KwaZulu-Natal.
Omunye wonondweba Isolezwe elixoxe naye, uthe uneminyaka engu-14 kanti ufunda uGrade 9.
UNdlovu uqashelwa kwesokucija iKZN nje uzakhele ugazi enqoba isicoco seSAB eSouth Coast neXI Experience.
“Ngonyaka odlule saphoxeka emidlalweni yokuhlunga eyagcina ingadlalanga KwaDukuza ngenxa yezinkinga zeSafa eThekwini kodwa kulokhu ngikwazile-ke ukubanyusela kwiABC Motsepe League abafana. Siyinqobe kabili kulandelana iligi yeSAB.”