Iganele esokeni efika kwiBucs
UMDLALI omusha we-Orlando Pirates, uVincent Pule ukufanisa nokufezeka kwephupho ukuzibona esesemndenini weZimnyama, asayine kuzona phezu kokukhonjwa komakhelwane iKaizer Chiefs.
UPule ubekhuluma kwi-website yePirates lapho eveze ukuthi yize kuqale kwamthusa ukuzwa indlela izinto ezenzeka ngayo kuleli qembu laseSoweto kodwa usefike wajwayela.
“Into engijabulisa kakhulu wukuthi ngilapha, ngidlalela elinye lamaqembu amakhulu ezweni. Angikholwa ukuthi yimi ngempela kodwa ngizizwa ngikhethekile ngokuba khona lapha. Akekho umfana ongaphuphi ngokudlalela leli qembu, nami ngangikufisa. Manje sekwenzeka engangivele ngikufisa,” kusho uPule.
Ukubadlali abayisishiyagalolunye abamenyezelwe iPirates emasontweni adlule. Abanye babo uBen Motshwari, Xola Mlambo adlale nabo kwiBidvest Wits, no-Asavela Mbekile osuka kwiMamelodi Sundowns.
Njengamanje iPirates iseZambia lapho iqhuba khona amalungiselelo esizini ka-2018/2019. Ngempelasonto idlale nePower Dynamos neNdola Select XI.
UPule uyiqalile eminye yale midlalo lapho bebambane ngo 1-1 neDynamos. INdola Select XI ishaywe ngo 4-1.
“Ngikholwa wukuthi kumele sisebenzele iqembu nabalandeli. Lokho kusho ukudlala ngokuzimisela nokuzigqaja. Kumele senze konke okusemandleni ukuba nesandla ekugcineni isiko leqembu lokuwina.”
Uthe ngesikhathi efika kweZimnyama uke waba novalo ngesikhathi iphini lomqeqeshi uRulani Mokwena libeluleka ngendlela yokudlala elindelwe kubona.
“IPirates inendlela ehlukile yokudlala kunalena ebengiyijwayele kwiWits. Bengikhathazekile ngesikhathi ngiqala ukufika, umqeqeshi uRulani esitshela ngesitayela sePirates. Bekunzima ukuqonda ukuthi ukhuluma ngani. Kodwa manje njengoba sesinemidlalo esiyidlalile sengikuyakuqonda abekusho nokuthi kulindelekeni kithina,” kusho uPule.
Khonamanjalo namuhla iPirates izoba nomcimbi wokuklomelisa abadlali abenze kahle ngesizini edlule.
Bese kuphele iminyaka iqembu lingabi nayo le miklomelo njengoba belingenzi kahle.
Ngesizini edlule likwazile ukuqeda endaweni yesibili kwi-log nokuzibekisela indawo kwiCAF Champions League.
Kubadlali abagqamile kukhona u-Innocent Maela, Justin Shonga, Marshall Munetsi abangabanye abaqokelwe emkhakheni womdlali osemncane othembisayo.