UKgoroge esikhaleni sikaBhulose kwiMbewu
SIZOVALWA nguTony Kgoroge emdlalweni Imbewu: The Seed isikhala sikaMpumelelo Bhulose okusanda kuvele izindaba zokuthi ukhonjwe afika ngayo.
Isolezwe lithole ngomthombo walo ongashayi eceleni ukuthi uTony useqalile ukuqopha lo mdlalo futhi uzolingisa indawo kaZimele, ebilingiswa uMpumelelo.
Kulo mdlalo uZimele ungusomabhizinisi oyisikhulu enkampanini iMaluju.
“Indawo ebilingiswa uMpumelelo bekungekho lula ukuthi iphele. UBhulose nophrojusa balo mdlalo sekuvele ukuthi kukhona ukungezwani phakathi kwabo, kangangokuba uMpumelelo useze wavulela uLeleti Khumalo ongomunye wabakhiqizi balo mdlalo icala. Uqale ukuqopha kulo mdlalo emasontweni adlule uTony,” kusho umthombo.
Lo mdlalo oqale ngo-Ephreli, ujatshulelwe ngabaningi ufika kodwa nezinkinga zasheshe zawukhungatha.
Okhulumela isiteshi sethelevishini i-e.TV, uMichael Pocock izolo ucele ukuthunyelelwa i-e-mail wathi bazophendula kuyona.
Kodwa kuze kwashaya isikhathi sokushicilela engaphenduli.
Kwenzeka lokhu nje Isolezwe NgeSonto liveze ukuthi lesi siteshi esikhombisa lo mdlalo sesimemezele ukuthi sisezinhlelweni zokususa izithombe ezisezikhangisweni ezinomlingisi uMpumelelo Bhulose.
Lo mlingisi kuvele ukuthi uzogcina ukubonakala kulo mdlalo ngo-Agasti 16.
UMichael uveze ukuthi bamatasa nemifanekiso emisha abazoyisebenzisa ezikhangisweni zalo mdlalo.