Uvalo kuqothwa abamatekisi
KUSOLWA udlame lwamatekisi oluqhubeka eGoli ngokubulawa kwabashayeli abebelalelwe unyendle eMnambithi, bebuya emngcwabeni womphathi wabo ongusomatekisi eMatimatolo ngoMgqibelo.
Lokhu kuvezwe okhulumela uMnyango wezokuThutha KwaZulu-Natal, uMnuz Kwanele Ncalane ngemuva kokuya endaweni yesigameko, benoNgqongqoshe walo Mnyango, uMnuz Mxolisi Kaunda.
Uthe kunodlame oluphakathi kosomatekisi baseTembisa naseKempton Park oluqhubekayo kodwa olungahlangene neKZN.
Kulesi sigameko kudutshulwe kwashona abantu abangu-11, kwalimala abane kwathi ababili baphuma bengenamyocu.
Abane baphuthunyiswe esibhedlela esiseduze.
Zibalelwa ku-250 izinhlamvu abashawe ngazo zezibhamu zohlobo lwe-AK 47 nama-R5 kanti imoto kuthiwa ibimbobo kuhle kwembawula.
“Abashayeli bamatekisi bebeyongcwaba umphathi wabo eMatimatolo nokuthe uma sebebuyela emuva bahlaselwa abebebalalele unyendle emahlathini aseColenso. Nokho kuhiwa ukuhlaselwa akuhlangene neKZN noma nodlame obelukhungethe imboni yamatekisi aseMnambithi. UNgqongqoshe uKaunda usexhumene noHulumeni waseGauteng ngalesi simo. Ukhulume noNgqongqoshe wezokuThutha u-Ismail Vadi nowezokuPhepha uNkk Sizakele Malobane Nkosi. Uphinde wathinta noNgqongqoshe wamaPhoyisa kuzwelonke uMnuz Bheki Cele ukuze baqinise uphenyo ngalesi sigameko,” kusho uNcalane.
Uphinde waveza ukuthi akukuhle ngoba kwenza abantu bahlalele ovalweni.
Uthe bakhathazekile ngalesi sigameko futhi basigxeka ngoba abakwazi ukuvuma ukuba iKZN iphendulwe isizinda sokucoboshisa abantu. Uqhube wathi uNgqongqoshe uKaunda usebenze ngokuzikhandla eqeda udlame lwamatekisi kososeshini abahlukene ngakho kumphatha kabi ukuthi udlame lwaseGoli luchaphazeleke kulesi sifundazwe. Ukubulawa kwabashayeli bamatekisi kuthuse ngisho umphakathi njengoba umndeni oseduze nalapho kwehle khona isiga ukhale ubumayemaye ebusuku uzwa ukuqhuma kwenganono ngaphandle.
Umama wasendaweni lapho kwehle khona isehlo ubonge abakubo abangasekho ngokumvikela. Uthi ubevika izinhlamvu nezingane zakhe ebezindiza igceke lonke ngezikhathi zehora lesithupha ntambamama.
“Ngiphuzile ukuqala ukupheka ngoba bekuyiSabatha. Ngithe ngisabeka amabhodwe kusanda kushaya u-6 ntamabama, ngezwa ngomsindo obuqhuma kungathi uthayela. Ngithuke ngafa ngihlangana nezinhlamvu ngaphandle ebezindiza igceke lonke,” kusho owesifazane eligodliwe igama lakhe ukumvikela.
Uthe ubezitshela ukuthi kuhlaselwa umuzi wakhe. Uthi umemezile ezincengela ukuthi bangamubulali nezingane zakhe.
“Ngibuyele endlini saqoqana nezingane ngimemeza ngincenga abadubulayo ukuthi bangasibulali. Bengilokhu ngithi ningasibulali zingane zami.”
Elinye ilungu lomndeni nalo elingafunanga ukudalulwa lithe alisakhumbuli nokuthi ziyeke nini ukukhala izibhamu ngendlela ebebephithene ngayo. “Ngikhumbula nje ngifonelwa umfana wami engibuza ukuthi kwenzekani, ngangazi ukuthi ngimphendule ngithini ngoba nami bengingazi ngaleso sikhathi ukuthi kwenzekani,” kuchaza ilungu lomphakathi.
UKhomishana wamaphoyisa kuzwelonke uGeneral Khehla Sitole usigxekile lesi sehlakalo.
Uthe amaphoyisa ophiko okukhona kuwo awobugebengu obuhleliwe, oKlebe, nabaseshi ubanika amahora angu-72, ukuzama ukubopha abasolwa abathinteka kulesi sigameko.
Obambe njengoNdunankulu esifundazweni, uMnuz Sihle Zikalala, naye usigxekile lesi sigameko. Uthe ukubulawa kwabantu kusho ukuthi kunemindeni engasenabo abantu abayondlayo.