Sezikwenye indawo izingane zesikole sezinyoka
SEZITHOLELWE indawo entsha yokufunda izingane zasesikoleni saseDundee ebesigcwele izinyoka.
Isikole iDundee Junior Secondary ebesinamakilasi amadala sesihleli sodwa manje silinde ukudilizwa njengoba kulindeleke ukuthi kwakhiwe kabusha ngoNovemba nonyaka.
Okhulumela uMnyango wezeMfundo KwaZuluNatal, uMnuz Muzi Mahlambi, uthe abafundi abalinganiselwa ku-900 bayiswe emahhovisi omnyango aseNdumeni.
“Kunamakilasi angu-21 angomahambanendlwana kuleya ndawo anamathoyilethi angu-18 namahhovisi ayisishiyagalolunye othisha nothishanhloko,” kusho uMahlambi.
Isikole obekufundela kusona abafundi bese sisidala nokwenze ukuthi abazali babhikishe bakhiphe izingane kusona bethi azifundele emahhovisi esifunda kuze kwakhiwe amakilasi asesimeni esifanele. Esinye sezigameko esishiye abazali becasukile kube ngesenyoka eyakhwifa ubuthi komunye umfundi osemncane.
UMnuz Mzwakhe Sithebe wenhlangano yomphakathi iNdumeni Civic Association, uthe kwakungafanele ukuthi kuze kufike ekutheni abazali bezingane babhikishe bavale isikole ukuze umnyango wenze okufanele.
Uthe lokhu kuyasho ukuthi kukhona igebe elikhulu phakathi kwabantu nohulumeni okufanele engabe usebenzela bona.
Ngokusho kukaMahlambi ukususa abafundi babayise kwenye indawo nokwenza izinhlelo zokuthi kwakhiwe akwenziwanga wukuthi bebexakwe yingcindezi yabazali kodwa bebenzela izingane bezama ukusheshisa noma bekunemibandela ethile obekufanele bayilandele.
“Bakuphakamisile sabe sesilalela. Akuzange kuthathe isikhathi eside ukuthi siqhamuke necebo kodwa besingeke sisuse izingane singenandawo esizozifaka kuyo,” kusho uMahlambi.
UMahlambi uthe uMnyango wezeMisebenzi yoMphakathi ulinde ukunikwa okhiye besikole esidala ukuze baqale ukusebenza.
Usihlalo wesigungu esilawula isikole, uMnuz Gift Gaysman, uthe kulindeleke ukuthi okhiye babathole ngesonto elizayo uma sekususwe yonke impahla yesikole.