Okukhathaza abatshalizimali
OSOMABHIZINISI bathi udaba lokubuyiswa komhlaba ngaphandle kwesinxephezelo luyabethusa abatshalizimali.
Lokhu kuvezwe nguNkk Busisiwe Mabuza engqungqutheleni yeBRICS Business Council izolo.
UNkk Mabuza uthe abatshalizimali bafuna ukwazi ukuthi umhlaba abazotshala kuwona imali ngeke udliwe yini kanti okwamanje akubacaceli yingakho besaba.
Uphinde waveza ukuthi bakhathazekile ngesimemezelo sikahulumeni wase-United States (US) ofuna ukufaka intela enkulu ensimbini nasemikhiqizweni ye-aluminium ethunyelwa khona.
UNkk Mabuza uthe ucwaningo lwabo luveza ukuthi kungase kulahleke amathuba omsebenzi angu7 000 ngenxa yokuthi abamafemu akhiqiza insimbi awanayo intela enkulu azoyikhokha ngokuthumela insimbi e-US.
“Asifuni kulahleke eminye imisebenzi ngoba vele sinesibalo esikhulu sabantu abangasebenzi,” kusho uNkk Mabuza.
Ungqongqoshe wezoHwebo neziMboni eNingizimu Afrika, uDkt Rob Davies, uthe uzobakhulumela osomabhizinisi kuhulumeni waseUS ukuthi bangakhokhiswa intela enkulu.
“Simatasa nezingxoxo nohulumeni wase-US zokuthi insimbi ne-aluminium yaseNingizimu Afrika kungakhokhi intela. Thina asithumeli insimbi eningi e-US okusho ukuthi ngeke siwise amabhizinisi akhona ensimbi,” kusho uDavies.
Mayelana nodaba lokubuyiswa komhlaba ngaphandle kwesinxephezelo, uDavies uthe uhulumeni ukubeke kwacaca ukuthi ngeke lwenziwe ngendlela ezophazamisa ukuthuthukiswa komnotho.
Ucele abatshalizimali ukuthi behlise umoya baqhubeke nokutshala imali eNingizimu Afrika ngoba inomnotho okhulayo futhi ibamukela ngezandla ezifudumele.